今個農曆新年係豬年， 唔少賀年禮盒都加入咗豬嘅元素。亦有唔少禮盒都睇得又食得！買嚟拜年定係等人嚟拜年都一定唔失禮！快啲揀返盒準備過年啦。
貴氣賀年糖果禮盒 Sugarfina
上年年中先至開到嚟香港嘅美國貴婦糖果品牌，今個新年首次推出限量版糖果全盒，仲係香港限定！除咗得意又貴氣嘅舞獅同燙金元素之外，裡面仲有一個放咗利是封嘅櫃桶仔㗎。而裡面八款糖果都係佢哋嘅人氣之選，就好似皇牌香檳小熊軟糖咁。另外仲有兩款應節新口味， 士多啤梨小豬軟糖同埋柑桔口味嘅黑朱古力，等大家「豬」年大「桔」大利。
聯乘台灣人氣蛋捲品牌 鴻福堂
台灣人氣蛋捲品牌海邊走走，招牌嘅花生餡味真係未食過都一定聽過！今個新年，佢哋就同鴻福堂合作推出「黑朱古力蛋捲」。一如既往嘅厚實蛋捲，加上70%嘅黑朱古力，肯定啖啖濃郁朱古力味，無論送禮定自己都一定爭住食！
獨特口味應客 鋒味曲奇
大家都知鋒味曲奇嘅甜、酸、苦、辣都已經夠晒刁鑽獨特啦，原來仲未夠！今年風味嘅賀年曲奇禮盒有成三個系列，十二款口味，就好似茶餐廳嘢飲系列之類都已經有四隻味。無論邊個上到嚟拜年，相信實有一款啱佢。
跟梳乎蛋遊澳門 英記餅家
拜年禮盒送餅一定最安全，點解咁講？因為起碼人人都鍾意食。好似呢間澳門餅店就推出梳乎蛋包裝嘅原味蛋卷同迷你蛋黃杏仁餅！香港嘅梳乎蛋Fans可以上yengkee.com.mo訂購呀。
走在設計尖端 Lady M
Lady M每次推出節日禮盒都實係「吸睛」、「呃Like打卡」嘅熱話。今次嘅新年糖果禮盒依然唔例外，呢個「桔慶糖果全盒」除咗暗藏機關，有得轉，有得拉之外，仲有6隻跳緊舞嘅金豬同你賀豬年。而且裡面嘅軟糖同朱古力都好精緻，絕對係捉緊時尚潮流嘅選擇。
新年換個新包裝 金鴨
新加坡人氣零食品牌金鴨出嘅鹹蛋魚皮同薯片真係食唔停，偶然經過見到都會買包食下，唔覺唔覺就會自己食晒成包。估唔到係新年，金鴨都換返個賀年包裝，仲有新年賀詞係上面。臨時臨急唔記得買盒嘢送禮畀人？即刻衝入便利店買金鴨就得！新包裝由即日起至2月19日全港7-11有售。
當傳統遇上潮流 甄沾記 x Or Tea？
當傳統遇上潮流 甄沾記 x Or Tea？
甄沾記椰子糖除咗係大家嘅集體回憶之外，亦係香港傳統工藝嘅見證。而Or Tea？呢個茶葉品牌就希望為傳統茶葉注入創意文化，將品茶化身為傳統延伸落嚟嘅潮流。所以今次搵埋甄沾記推出禮盒，比大家一邊品茶一邊食蛋捲。包裝仲好可愛！一啲都唔老土㗎。禮盒可以係Or Tea？嘅網站 https://www.eggroll.or-tea.com 或者喺3hreesixty，City Super同崇光購買。
新年有米夠實際 香港精米所 三代目 俵屋玄兵衛
原來依家日本興送靚米當禮盒畀人！送頂級日本米畀人又真係有創意得嚟又實際，仲好有意頭，有米吖嘛。「三代目俵屋玄兵衛」首推嘅「喜有此米」禮品系列，使用100%高品質日本米，包括有北海道米業最上等米種——米味濃郁、粘度十足嘅夢美人、北海道七星同兵庫鴻鳥（越光）等米，而且堅持喺香港新鮮磨米，因為太早喺日本就磨米嘅話會流失晒啲米香㗎，部分禮盒仲有埋多支純米大吟釀或者天然釀造豉酒添。農曆新年前夕，喺三代目俵屋玄兵衛網店http://www.tawaraya.com.hk/，或者喺1月27日至2月4日期間舉行嘅希慎廣場日本櫻花祭都買得到。
自選甜蜜手工朱古力 Emack & Bolio's
呢間美國過江龍嘅雪糕夠哂出名，原來佢地仲有超過20年整手工朱古力嘅經驗呀。即日起至2月17號可以去佢地4間分店，從30款波士頓純手工朱古力當中，自由組合8件成為獨一無二嘅手工朱古力禮盒！朱古力口味選擇多元化，配料有果仁、生果、oreo餅、棉花糖等，最啱送畀甜魔朋友。
文：Yanny
相：Kar
相：Kar