今年開飯仔特別搵咗自命對追求味覺有強烈使命感嘅「特種開飯團」，進行十面埋伏、吖唔係、係全面巡邏全港九新界，一日食足十餐幫大家地氈式搜索，從唔同地區、唔同菜式當中搵出真正本土滋味！
香港嘅甜魔其實都幾幸福，唔信？今次輪到最鐘意食甜品嘅團結步兵Infantry報告一下入圍嘅甜品店，由特色軟雪糕、日本抹茶老店、創意甜品畫，到精緻西式甜品都有。睇哂介紹，記得Bookmark心水同朋友一起去試之餘，亦要去投下你嘅神聖一票啊！
特色香濃軟雪糕 The Little Corner
圖：Gigi Pig
好彩香港嘅冬天唔算太凍，咁就攞正牌一年四季都可以食雪糕啦。特別係呢間小店嘅軟雪糕，皆因佢地每個月都會有限定口味，例如舊年11月嘅九龍城樂園港式奶茶，同12月嘅鹿兒島紫薯口味都大受歡迎。常設口味亦唔輸洩，桑莓啤酒味食到Hoegaarden Rosée嘅酸甜同微微啤酒香味，靜岡焙茶同宇治抹茶亦帶濃郁茶香而唔苦澀。
香甜空氣感Pancake PAN de PAIN Pancakes & Sweets
圖：kitsu
成日喺Instagram同Facebook見到朋友仔去日本食Pancake覺得好羨慕？其實香港都有唔少日式Pancake餐廳，例如呢間嘅招牌Soufflé Pancake就名副其實，一切開就感受到質感特別鬆軟而有空氣感，食落清甜輕盈。甜魔相聚可以嗌埋賣相吸睛嘅Strawberry Pancake，或者有焦糖脆面嘅Creme Brûlée Pancake，同樣滿足。
分子料理x甜品藝術 ATUM Desserant
圖：ally_07
靜靜雞話畀你知，呢間係唔少女士們最想試嘅甜品店之一，因為呢間嘅甜品賣相特別有藝術感，放上網「呃Like」一流！上到餐廳一開始杯Welcome Drink已經係用試管裝，夠趣致。甜品畫Improvisation會由吧枱中間嘅甜品師傅用果醬、朱古力、棉花糖同即場用氮氣整嘅分子雪糕等材料隨意發揮，成個體驗都相當新奇有趣。
米芝蓮加持甜品屋 Joyful Dessert House
能夠喺黑布街呢條甜品街生存，仲要連續喺2016同2017年都得到米芝蓮街頭小食推介嘅肯定，呢間甜品屋靠嘅就係誠意。芒果拿破崙賣相精緻，三層酥皮都非常香脆鬆化帶牛油香，配埋多汁嘅芒果肉、Creamy吉士忌廉同芒果雪糕一齊食層次豐富。燒菠蘿雪芭上面有大大塊燒過嘅焦糖菠蘿，下面嘅菠蘿雪芭酸甜有致。
特色奶昔x半熟芝士撻 Candy Shake
細細個食到一粒糖就好開心，大個咗反而搵唔返呢種單純嘅快樂？呢間甜品店就以糖果奶昔嚟做賣點，將唔同牌子嘅糖同朱古力打成奶昔，例如金莎奶昔中間加咗粒金色榛子朱古力，又有粉紅色朱古力碎裝飾，但飲落無想象中咁甜膩，味道平衡。另外佢地仲有唔同口味嘅半熟芝士撻，由原味、抹茶、紫薯到重口味榴槤都有！
京都200年抹茶老店 京林屋
圖：走花生
香港最近嘅抹茶熱潮好似稍微冷卻咗少少，不過呢間嚟自日本京都有超過200年歷史嘅抹茶店就繼續站穩陣腳。香港限定芭菲係唔少抹茶控第一次去必試嘅甜品，一杯有齊招牌抹茶雪糕、白玉、抹茶蕨餅、脆米、抹茶啫喱、寒天同紅豆，豐富得嚟味道同口感都配搭得宜。秘製抹茶蕨餅口感軟中帶少少煙韌，茶香濃郁有回甘。
無論你係咪同團結步兵Infantry一樣係甜品控，記得留意入圍名單仲有Via Tokyo，HeSheEat，小甜谷同Next Station Dessert呢四間。揀啱心水就記得去投你嘅神聖一票啦！
投票網站：https://www.openrice.com/info/awards2017/index.html
文：Cathy
隨時接收最新資訊
讚好OpenRice專頁！