【飲食潮流】傳統餅店推限時優惠 5毫子個老婆餅！

灣仔一帶都有好多歷史嘅建築，其中一間歷史悠久嘅傳統餅店，就揀咗喺呢度開咗間旗艦店，希望重現舊日香港嘅情景。呢間舖一睇就知係行懷舊路線，而佢同其他分店最大嘅唔同就係有一個開放式廚房，每日都有新鮮熱製嘅現烤舊式香港餅食，包括老婆餅、皮蛋酥等等，其中，蛋撻同咖喱角更加係首次喺奇華店內出現！

蛋撻暫時只係得酥皮蛋撻，但啱啱熱辣辣整好出爐嘅係酥化啲嘅，就算你撞唔啱佢嘅出爐時間，所有餅點都會放喺一個40度恆溫嘅保暖櫃入面，開飯仔開櫃夾撻嗰陣都feel到嗰陣暖氣！

雖然佢哋平時都有出開蝴蝶酥，但係呢個size大好多，仲要係熱食嘅，酥脆、牛油味香，係細細個放學喺屋村麵包舖度食到嗰隻呀！

咖喱角、雞批、叉燒酥幾樣懷舊餅食好夠熱之餘，仲相當足料，鹹甜度都適中，蛋香味十足，原來係因為師傅喺焗製之前搽咗兩層蛋漿㗎。

舖頭空間感大，現烤熱食只係佔一個角落，其餘嘅corner仲有嫁喜區、手信區，同埋模型區！係呀，餅店有大約三分一嘅位唔係賣嘢，而係放咗啲香港舊相同埋微型藝術模型，呈現返五、六十年代嘅上海街景（第一間舖位），手工相當精細呀！

同埋大家記得mark實呢個日期：2月10-12號！
呢3日嘅現烤老婆餅，每個只係賣5毫子咋！真係好似返返去舊陣時咁……呢3日每日下晝1點後開售，每日限量188盒（4件裝），每人最多買1盒咋。

奇華餅家
地址：灣仔皇后大道東188號地舖