三層架上總共有10款點心，另加一壺有美顏功效嘅玫瑰菊花茶（大廚話成個餐太多蜜糖就會太甜，所以呢壺茶呢，就冇落蜜糖嘅，不過如果大家鍾意，係可以自己加嘅）。咁多樣唔知由邊度開始食起好？嗱，拋少少書包，通常都係由最底嗰層開始，由鹹食到甜食嘅。最底嗰層有芝士忌廉煙三文魚蜂蜜他他酥盒、迷你蜂蜜牛肉漢堡、蜂蜜雞翼同埋巴拿馬火腿蜂蜜西多士。其中，西多士以巴拿馬火腿代替花生醬，再自行按喜好搽上蜜糖，即刻令呢款傳統茶餐廳美食成功再升lvl。
第二層就有芒果蜂蜜蛋、玫瑰白朱古力蜂蜜慕絲蛋糕、馬卡龍同埋金箔士多啤梨蜂蜜撻。不得不提嘅係芒果蜂蜜蛋，驟眼望落去仲以為係溏心蛋，點知，分子料理嚟嘅喂！中間疑似蛋黃嘅係新鮮芒果汁嚟，食落口有少少流心嘅感覺，而偽蛋白其實就係蜂蜜加椰子忌廉。雖然畀佢欺騙咗我感情，但係食落同雞蛋一樣咁軟滑，又有絲絲椰香，sweet返晒，就和數啦。
最高嗰層就係黑加侖子蜂蜜慕絲杯，同埋蜂蜜蛋糕。雖然話甜品係第二個胃，但其實食到嚟呢層已經有啲飽，不過冇理由咁輕易放過啲甜品㗎？所以同一班friend子食下傾下，就可以繼續作戰到底！Oush！黑加侖子蜂蜜慕絲杯有一層蜂蜜喺最面，一絲甜過後，就會食到略帶點酸嘅幼滑慕絲，層次分明。呀，講咗咁耐，係平日先有得食㗎咋留意返。
搵食詳情
日期：即日起至12月31日
時間：逢星期一至五 3:15pm – 5:15pm
價錢：$258 兩位用，另設加一服務費
訂座電話：3716 2898
文：Kar
隨時接收最新資訊
讚好OpenRice專頁！
