大熱嘅五層流心芝士軟包（左）今次出咗芒果味（右），有望繼續成為全港最邪惡麵包！
唔可以原諒！尖沙咀呢間烘焙店之前出嘅五層流心芝士軟包已經喺網上成日洗版，最近仲要出埋新嘅五層流心芒果芝士軟包。叮熱流心效果一流，雪凍又似芒果芝士雪糕，真係有望成為全港最邪惡嘅麵包，邪惡到叫人唔記得咩叫Keep Fit，仲唔係唔可以原諒？
麵包放喺室溫就已經有流心效果，流心麵包個名一啲都唔流
嚟自奧地利有近百年歷史嘅麥上日光，舊年年尾一開張就以五層流心芝士軟包虜獲唔少芝士控嘅心。嚟到夏天，佢地就新推出呢款季節限定嘅五層流心芒果芝士軟包，邪惡香滑Cream Cheese加上芒果醬，入口仲食到少少芒果蓉！味道自然酸甜，有芝士奶香嘅餘韻之餘，亦比之前嘅芝士味多咗份水果嘅清新。
開飯仔將芝士軟包用微波爐叮熱半分鐘，切開流心效果更澎拜！
而且呢個包仲有三種食法，一買上手室溫食就最食到芝士餡嘅柔滑口感。另外仲可以放落微波爐稍微叮熱，芝士餡就更加有流心效果，小心食到周圍都係！而開飯仔最愛嘅係放入雪櫃雪一陣再食，芝士餡食落好似雪糕咁，用天然酵母發酵嘅鬆軟麵包夾住，呢份雪糕三文治仲唔係消暑恩物？
烘焙店同時提供室溫同雪櫃兩種溫度，室溫更有流心效果！
比個小貼士大家，兩款流心芝士軟包都係限量供應，每日中午十二點開始出爐，經過幾轉之後下午三至四點會再有幾轉出爐，如果放工六點先去買隨時買唔到。
抹茶泡泡（左）同荔枝泡泡（右）嘅芝士餡都非常誘人
正宗芝士控仲可以試埋一樣新出嘅抹茶泡泡同荔枝泡泡，芝士餡比芝士軟包更有流心效果，芝士味亦相當濃郁，帶少少天然酸香。泡芙皮亦夠脆口，不過略嫌抹茶同荔枝味道比芝士味蓋過咗，抹茶控可能要失望，但芝士控應該會超Like。
沖繩紫薯公主嘅紫色好吸睛，味道亦好似公主咁Sweet
有芝士、抹茶，估唔到仲有另一食界大熱紫薯！呢個沖繩紫薯公主一樣係季節限定，紫色外表好Sharp醒，紫薯餡都幾多，味道偏甜少少。值得一讃嘅係麵包質地鬆軟得嚟又唔會係食完好似無食嘅「空氣麵包」。
最後嚟個預告，烘焙店預計下個月尾會喺灣仔開新分店，大間啲之餘亦有少量座位，可以坐低嗌杯飲品配麵包食。最重要嘅係，灣仔店會有獨家邪惡麵包供應，成件事會唔會太邪惡，太銷魂？
隨時接收最新資訊
讚好OpenRice專頁！