正所謂「好嘅開始係成功嘅一半」，咁新一年梗係都要有個好開始啦。嗱，食返個afternoon tea夠好未？仲要係全朱古力宴嘅下午茶！灣景國際灣景廳由下年（即係幾日後）開始，推出以Lindt瑞士蓮朱古力打造嘅甜品下午茶自助餐呀！
呢個半球體狀，個面立立令嘅特濃香橙朱古力軟心蛋糕，裡面原來係香橙醬流心嚟，一切開就會湧出嚟，好滾動！而鬆軟嘅朱古力蛋糕混埋香橙醬又唔會太甜，仲有淡淡嘅甘香。
另一個值得留意嘅係朱古力開心果蛋糕。開心果除咗平時當果仁食之外，用嚟做甜品嘅食材亦相當之唔錯。今次，就係用咗原粒開心果嚟磨醬，加埋忌廉咁打發成開心果忌廉，鋪喺朱古力蛋糕面，一啖咬落去，嗯，好有開心果味！
至於呢個高身杯裝住嘅，係海鹽朱古力忌廉，除咗忌廉之外，中間仲夾住榛子脆脆㗎，甜中帶鹹、軟中帶脆，咁細杯，兩三啖就食完，絕對令人有衝動食完一杯再一杯囉！
仲有呢個波波，外面係炸到脆卜卜嘅朱古力，一咬，裡面就係流質嘅朱古力醬。嗱，唔好話我唔提你，啲朱古力醬仲係熱㗎！我都好想石一甩呀，噢，我指食一粒。喂，不過千其唔好咁衝動即刻拎假去食呀，星期六、日同公假先有㗎咋！
詳情
日期：1月1日至2月28日 （逢星期六、日、公眾假期）
時間：3:30pm – 5:30pm
地址：灣景廳（灣仔港灣道4號灣景國際1樓）
電話：3909 9088
文：Kar
隨時接收最新資訊
讚好OpenRice專頁！
