抹茶嘅熱潮好似從來都冇減退過咁，繼續有好多餐廳推出各式各樣嘅抹茶產品，而抹茶控見到又繼續好興奮，然後to-eat-list就愈嚟愈長。最近，又有間餅店同京都抹茶名店「宇治‧丸久小山園」合作，出咗一系列嘅抹茶蛋糕同甜品！

抹茶軟朱古力及白芝麻蛋糕

用上100% 丸久小山園抹茶「若竹」去整，抹茶軟朱古力，甜得嚟帶點甘，夾住抹茶芝麻脆、黑芝麻醬同抹茶mousse，一層綠一層黑一層白，白色嘅係日本白芝麻蛋糕，好鬆軟。

抹茶忌廉芝士蛋糕

相信唔少抹茶控同時都係隻芝士怪，呢個cake就啱晒。用抹茶芝士mousse，裝住一片片嘅白朱古力片，幾種飛佛放埋一齊，應該會幾得到你哋嘅歡心。

抹茶紅豆忌廉蛋糕 / 抹茶紅豆忌廉蛋糕 cake little

幾時都話，抹茶紅豆永遠都係最佳拍檔，呢個cake，size有大有細，一大班人開心食又得，少少地幾個人食都得。

而家行入去呢間餅舖，應該淨係會見到綠色嘢，事關除咗呢3個cake，仲有啲一人份嘅抹茶甜品，例如宇治抹茶卷呀、抹茶及焙茶卷呀、抹茶及焙茶甜品杯呀同抹茶撻咁。年尾要派散水餅嘅朋友仔可以考慮下喎都，買夠3件以上就有85折。

詳情
東海堂全線分店有售