 | Simply Nutrition 營養師陳小艷（Sharon），香港大學食物及營養學畢業，並取得社區營養深造證書，曾於不同機構分享營養知識。fb專頁: nutritionsharing |
「好灰...基本上呢1-2年塊面無一日係好嘅... 」
「春夏一到，塊面就開始生暗瘡，點算呢？」
「時不時都會爆下瘡，我仲有幾個月就結婚啦，食啲咩有幫助？」......
你係咪都面對緊暗瘡嘅煩惱呢？好想知道有咩方法可以快啲擊退暗瘡？一般人都識嘅簡單建議係「食得清淡啲」，但實質係要食啲咩食物，攝取啲咩營養素先可以對症下藥，擊退暗瘡，就唔係太多人講得出。有見及此，係度同大家介紹5大營養素同預防暗瘡餐單，讓你快快遠離暗瘡嘅煩惱！
擊退暗瘡營養素
維他命A
維他命A可促進皮膚組織生長，同時具抗氧化作用，有助減少皮膚油脂受氧化。含豐富維他命A嘅食物包括胡蘿蔔、木瓜、魚肝油、豬肝、菠菜等。提提你，維他命A係油溶性，配合脂肪食用更有助吸收㗎！
維他命B
維他命B可維持日常皮膚修護及再生，具有消炎作用，同時都有助維持神經系統嘅穩定性，有助減壓，要知道壓力會影響皮脂嘅情況，刺激暗瘡生長，所以攝取足夠嘅維他命B有助預防暗瘡。含豐富維他命B嘅食物包括糙米、紅米、燕麥、瘦肉、雞肉、蛋、牛奶、乳酪、香蕉等。提提你，進食高糖及高脂食物例如蛋糕、糖果、朱古力、汽水等會導致維他命B流失㗎！
維他命C
維他命C係製造真皮層骨膠原蛋白及彈性蛋白嘅重要成分，有助維持皮膚彈性，仲具美白功效，減少黑斑、雀斑形成添！含豐富維他命C嘅食物包括柑橘類(例如橙、金桔、檸檬、西柚)、番石榴、奇異果、士多啤梨、藍莓、綠葉蔬菜等。不過，維他命C容易受熱被破壞，所以蔬果最好新鮮即食或以快炒形式進食，可減少維他命C嘅流失。
奧米加3脂肪酸
奧米加3脂肪酸有助減少炎症，平衡內分泌同促進傷口癒合。深海魚例如三文魚、吞拿魚、沙甸魚等都含豐富奧米加3脂肪酸。美國心臟協會建議每星期最少食2次4安士深海魚。
鋅
鋅可提升身體免疫力，防止傷口發炎，助傷口癒合同埋減少疤痕產生。生蠔、牛肉、豬肉、肝臟、蜆肉、龍蝦、黃豆、芝麻、杏仁、牛奶等都含豐富嘅鋅㗎！一般嚟講，成年男士每日需要11毫克鋅，女士則需要8毫克。
以下提供一日嘅預防暗瘡餐單，如果想得到更多餐單，入嚟我嘅fb專頁啦！！
※上述內容純屬作者個人意見，不代表本網立場。※