「一個人食飯食乜好？」相信呢個係好多人都諗或者面對嘅問題，好似冇乜奶油一支公去食放題或者鋸扒，於是有人會揀掃街、有人會揀食便利店或者快餐店，甚至有啲人會寧願唔食。但其實一個人食飯又有咩好怕喎？邊個話要一班人先可以食好西？下次唔使再問一個人喺xx食乜好喇，等開飯仔幫你揀啦，今次講下中環。
超滑滑蛋叉燒飯 樂香園咖啡室
一個人食茶記好正常吖，坐落一枱可能個個都係搭枱嘅。呢間茶記嘅招牌菜係滑蛋叉燒飯，幾乎個個嚟到都係食呢味。因為佢嘅滑蛋真係炒得好滑，色水又夠，熱辣辣咁上㗎！香蔥就更加係成碟飯嘅精髓，炒過嘅蔥特別香嘅，$40蚊碟，好食得嚟又食得飽，而且都唔算好頹啫，OK啦。
濃湯底拉麵 長浜No.1拉麵
對自己好少少嘅，一個人都可以坐低食碗拉麵嘅。不過提一提先，呢度嘅湯底相對出面嘅嚟講係比較濃啲、重味啲。而拉麵就可以自行選擇硬度，仲做到掛湯嘅效果係唔錯嘅。食得辣嘅建議可揀辛味噌拉麵，好香口！如果唔係豬骨湯拉麵都得，有網友覺得湯底濃到好似飲緊骨膠原蛋白咁添呀。
羊肉餡漢堡 白鬍子炸魚薯條
有時自己一個人行下海旁，望下海吹下風，都係一種浪漫嚟。喺中環碼頭呢間紐西蘭餐廳買完fish and chips之後去海邊食都係一種享受。薯條超粗，即叫即炸，啖啖都係薯蓉！炸魚都有幾款，炸鱈魚脆得嚟又唔散，肉身都好滑。另外漢堡扒係羊肉嚟嘅，膻味唔算濃但勝在夠鮮夠juicy，仲會搽多層藍莓醬添。
【一個人開飯】系列： |
肉丸白粥 黃枝記
好多人嚟呢度都係食佢哋嘅麵，但都可以試下啲粥呀，煲得好綿㗎。肉丸粥係一個唔錯嘅選擇，手打肉丸嚟，粒粒都大大粒咁，彈牙爽口。怕食粥唔飽可以叫多個小食，反正自己一個食，唔會有人笑你大食㗎科科。炸雲吞同樣大粒，仲好鬼脆添呀，送粥幾好。
邊理髮邊食多士 辦館
如果怕一個人食嘢悶嘅朋友，可以考慮下嚟呢間餐廳喎，有人陪，仲要係髮型師陪添呀。唔係講笑，呢間餐廳同髮型舖合作，你一邊食嘢，一邊就會有駐場髮型師幫你set頭，成件事係型嘅。餐廳食物就以輕食為主，多士、蛋糕等等，同埋咖啡，但唔好睇少啲多士呀，黑松露芝士多士或者溫泉蛋火腿芝士多士，啲芝士半溶狀態，隻蛋又「郎下郎下」咁，一篤就流蛋黃汁！
文：Kar