唔經唔覺就到咗世界盃開鑼嘅日子啦，唔少餐廳都特別推出咗唔同嘅菜式同優惠迎接世界盃，花多眼亂唔知去邊間好？唔少餐廳做緊特別主題promotion，有得食又有得玩，有啲仲有獎抽，作為球迷，睇波之餘都要食得有氣氛！

世界盃氣墊球比賽　Spirit Sports Bar

想搵個地方飲嘢睇波之餘仲有嘢玩？呢間酒吧餐廳由莊思敏開設，地方四正企理，而且喺銅鑼灣夠就腳。除咗有一系列睇波小食同飲品，餐廳特別增設咗一部氣墊球機，只要惠顧世界盃美食拼盤，即可免費參加世界盃氣墊球比賽，投入得最多氣墊球嘅參賽者，仲可以得到$500現金禮券添！其他參賽者都可以獲得世界杯限定飲品一杯。

環球小食　Centre Street Bar

睇波最好就係一邊食小食，一邊飲返杯，咁先夠爽嘛。餐廳特別為世界盃推出嘅唔同國家嘅小食，撐德國嘅就梗係要嗌返個德國咸豬手，而阿根廷嘅代表就有香辣鮮蝦熱狗，韓國就有部隊石鍋辛辣麵，一於嗌多幾個小食，撐你支持嘅球隊！酒吧亦有優惠套餐，兩公升啤酒塔配兩款小食，最啱朋友開心share !

期間限定湯底　牛涮鍋

呢間火鍋店雖然就冇得睇波，但特別推出咗兩款世界盃期間限定湯底，係俄羅斯style嘅紅菜頭羅宋湯同法式洋蔥牛肉清湯。部份鋪頭更加增設足球主題裝飾，感覺好有氣氛。而食客只要惠顧某啤酒，仲有機會嬴取俄羅斯世界盃雙人5日4夜決賽之旅，等你可以親身飛去睇比賽！

全部賽事直播　café bar on 8

想睇足咁多場賽事嘅話，就要嚟呢間酒吧餐廳啦。佢將會直播全部64場賽事，一場都不能少呀。而且仲特別推出咗6款足球美食拼盤，有魚子醬、炸馬介休球同炸魚薯條等小食，比坊間酒吧更有心思。仲有各式特調雞尾酒，總有一款啱你心水！但位置就吊腳少少，勝在自成一國，鍾意點嗌都得！

創意cocktail　華岸酒吧扒房

呢間餐廳就好適合鍾意試唔同cocktail嘅朋友，佢特別推出咗32款以伏特加為基酒調製嘅雞尾酒，一於叫多幾個朋友嚟試多幾款！而小食就有酥炸肉丸配芝士、墨西哥火腿芝士餡餅同香炸牛肉配薯仔沙律等。除咗cocktail之外，佢仲供應多達100種啤酒同8種本土手工啤，啱曬酒鬼！

文：Crystal