倫敦出名嘅點止得Fish & Chips？其中一間名店Burger & Lobster，獨沽一味只賣漢堡與龍蝦，就賣到街知巷聞，開業6年，英國有10 間分店，海外分店則有紐約、斯德哥爾摩、杜拜等，上星期喺曼谷開設分店，最近香港呀！開飯仔咁啱喺曼谷撞正開幕，梗係要試試佢！
餐廳位於Gaysorn Village，即係Central World隔離，最近BTS站為Chit Lom，都幾方便。我哋一行7人，6點左右去到餐廳，要8.30pm先有位。留名同電話之後，夠鐘返到來等一陣已經可以入座。
餐廳環境較黑，中間一張大圓枱，其他枱以圓形梳化及長枱為主。牆身一幅Andy Warhol式龍蝦壁畫加埋工業風燈膽，裝修夠晒型格。現時餐廳只開一半座位，另一半變成等候區。
餐牌好簡單，漢堡、原隻龍蝦同龍蝦包各有三款，仲有泰國必備嘅芒果糯米飯，同英國店嘅餐牌有少少分別。菜式價錢由750Baht至2,900Baht不等，即港幣$177至$686。
原隻龍蝦1,500Baht（約$354）重1.5磅，可以揀清蒸或者燒烤。龍蝦新鮮而且肉厚，肉質嫩滑juicy，燒烤配上燒烤汁就香口啲，蒸龍蝦肉質就滑啲，而且食到微鹹鮮味。配上招牌檸檬蒜頭牛油，牛油味濃郁，個人覺得點少少就夠。仲有一款Chilli Lobster，可惜當日冇供應。
原味龍蝦包比英國貴，配日式沙律醬及檸檬，龍蝦肉較多。牛油果則有牛油果蓉、生菜、番茄、青瓜，醬汁酸香幾開胃，但略嫌龍蝦肉較少，只係食到配料。麵包軟熟，食落質感味道都唔錯。
漢堡包有6安士內布拉斯加州產牛肉，叫咗medium well，但咬落仍然有豐富肉汁，牛肉味亦濃郁。配埋生菜、番茄、自家醃漬酸瓜、秘製醬汁，食埋薯條同沙律，都幾飽吓。另一款則有龍蝦肉，不過價錢就貴三倍。
雞尾酒都幾好飲，呢杯At Home & Away，有半個新鮮熱情果，伏特加配薑、青瓜、辣椒同青檸，好似凍飲嘅冬蔭功湯，入口夠晒酸辣，非常開胃！
總括來講，開飯仔覺得食物質素係唔錯嘅，龍蝦新鮮多肉，而且食完成個餐都幾飽，不過整體食物就偏濃味，薯條、沙律都幾鹹吓。人均消費約$500港紙，喺泰國嚟講真係高消費！除非抱住朝聖心態非試不可，不如去食泰式海鮮好過。
地址：Gaysorn Village, G Floor, Phloen Chit Road, Pathum Wan, Bangkok, Lum Phi Ni
文、相、片：Perrins