上星期元朗YOHO MALL正式開通，新開約有100間商戶，仲有全新界西最大嘅IMAX戲院。開飯仔最關心都係有咩食，有18間新餐廳，部分仲係首次進駐新界，不過就以分店居多，好似穴壽司、金田家拉麵、韓國連鎖炸雞店NeNe Chicken等。
勝在唔少餐廳都有YOHO MALL分店獨家新菜式，而且部分餐廳仲升呢，好似御前上茶為更多食物選擇嘅概念店，王子飯店亦變身王子私房菜，8月份開業的Glasshouse，更以單車做主題，比普通分店更有新鮮感，有餐廳仲設有露天座位。睇睇以下餐廳有咩新菜式先：
必吃泰式奶茶蛋撻 Mango Tree Café
泰國名店Mango Tree副線，餐廳佔地5,600呎，一系列道菜式係分店限定，包括泰北燒豬肉串乾撈麵、帕泰醬炒蝦蟹、招牌泰式鹵水乳鴿、芝士大頭蝦焗伊麵等等。最吸引係首創斑蘭及泰式奶茶雙色蛋撻，下午茶仲配特飲一杯。
首創自助炸雞年糕鍋 NeNe Chicken
繼旺角及葵芳分店，第三間分店有新食法，就係設自助區享用20款食物及年糕！先喺7種炸雞口味揀一種，自問食得的話，仲可以加$30無限添食任何口味，之後可在自助吧檯自取配料食年糕鍋，好啱鍾意食韓國菜又食極唔飽嘅朋友！
首設café食芭菲 Outback Steakhouse
連老牌澳洲菜Outback都有啲新意思，首設的café 區以地標Ululu作設計，亦有迴力鏢、風車等充滿澳洲特色嘅裝飾，年底亦有露天座位可以攤抖，可以柯打三款限定檸檬藍莓、杏仁草莓果仁朱古力芭菲，感覺悠閒。
其他餐廳列表
Paper Stone Bakery
王子私房菜
預計8月開業
Urban - café commune
文：Perrins