香港地Pizza專門店何其多，最近中環又新開一間，店舖由同時兼任意大利粉專門店Pici嘅主廚Andrea主理，薄餅全部手工製作，聽聞Andrea花咗三個月時間，每日不停試驗，先研發出呢款佢滿意嘅餅皮～雖然店舖位於出名租貴嘅中環，但呢度全部食物及飲品嘅價錢都幾「貼地」吓。

講到Pizza，餅皮當然係靈魂。好多人唔係太鍾意Pizza都係因為覺得佢過於飽肚，食一兩片個肚已經放唔落其他嘢，主廚話咁係因為麵團發酵得唔夠，食落肚後繼續發酵就會較易有飽肚感。呢度就將麵團用六種唔同麵粉搓成，預先發酵一日，烤出嚟嘅薄餅外脆內軟，空氣感極重，食落都輕盈啲。

Carbonara 卡邦尼薄餅 ($120)

卡邦尼意粉就食得多，卡邦尼口味薄餅你又食過未？材料包括意式煙肉、鵪鶉蛋、蕃茄醬及牛乳製莫薩里拉芝士，意式煙肉味道帶鹹香，配埋流心鵪鶉蛋黃食好滿足。

Nduja意式辣腸薄餅($100)

鍾意食辣嘅朋友要試試呢款～加入意式辣腸、斯卡莫札芝士、蕃茄醬及牛乳製莫薩里拉芝士，味道香辣惹味，啱晒各位食肉獸。

Pesto水牛芝士青醬薄餅 ($110)

餐廳好friendly供應三款素食者都食得嘅口味。好似呢個水牛芝士青醬薄餅，有車里茄、布拉塔芝士、牛乳製莫薩里拉同水牛芝士，芝士控都一樣啱食。

炸水牛芝士球($95)、酥炸意大利餃($85)

除咗pizza餐廳仲有得食各種意式小食，好似呢個用水牛芝士炸成嘅芝士波波，同埋酥炸意大利餃，推薦蛋黃醬吞拿魚配酸豆，味道幾清新吓。

另外餐廳供應接近三十款酒類，全部都均一定價，分別是每枝$300、每玻璃酒壺瓶$220元及每杯$70，一樣抵飲！

The Pizza Project

地址: 中環蘇豪卑利街26號地舖

文: Yanica

相、片: Tom Li