去大角咀，識食梗係食呢啲！5間淨係得大角咀先有得食嘅餐廳

介乎喺旺角、油麻地、深水埗中間嘅大角咀，雖然只係一個小小嘅區，但就暗藏咗唔少好（東）西，我唔直接話你聽，我用例子答你，呢5間餐廳，都淨係得大角咀先有得食㗎咋！有時要搵好嘢食，難免專誠跨區㗎喇！

舊香港味道 英記油渣麵

Photos by 南方舞廳 & noel.ho.1297
以前掃街，最鍾意就係食油渣麵。不過大大下，喺提倡所謂健康飲食嘅社會入面，呢啲咁肥膩嘅「下欄嘢」就好似慢慢唔見晒咁。好彩大角咀仲有一間餐廳有得食！傳統茶餐廳咁嘅裝修，木枱膠櫈，好親切！

成間餐廳淨係得兩種麵揀，一係大油渣麵，一係細油渣麵。係，冇錯，明眼嘅你一睇就知其實即係得一種麵，嗯，都仲可以有其他餸嘅，其實即係雞翼同芝士腸，加多碟油菜囉。選擇唔係好多，不過你去得呢度食，其實都係為咗油渣麵而嚟嘅啫，冇其他選擇又好合理。

落單後好快就上菜，熱辣辣嘅豬油渣麵除咗有豬肉，仲鋪滿晒冬菇冬菜同香蔥，而麵就係厚身彈牙嘅上海麵，幾有口感。湯底比想像中少油，食得辣嘅朋友記得要落埋佢哋秘製嘅辣椒油，因為真係好辣！但係作為調味絕對一流。不過提一提返，佢哋夜晚7點先開門，唔好一早自己摸上門呀……

泰好食小店 金柚泰國餐廳

Photos by JoBu & so_faye & Pigsy
呢間由泰國人主理嘅泰國餐廳，位處喺條靜嚶嚶嘅橫街，由侍應到廚師都係泰國人，睇個樣都知好正宗，甚至正宗到連埋單張單都係寫泰文，就咁睇都唔知邊碟打邊碟。

食泰國菜，咖喱應該係必食之選。呢度嘅黃咖喱唔會一味淨係得個辣字，仲甜甜地，叫碟黃咖喱豬／牛／雞，最好叫多個軟身嘅薄餅嚟送蘸汁，塊薄餅索晒啲咖喱汁，好鬼惹味！咖喱軟殼蟹就更加吸引，仲配埋多士包㗎，炸到又脆又軟咁再夾住塊脆卜卜嘅多士，脆上加脆！

仲有生蝦，大大碟，有成10條咁多都不過係68蚊，一定要點埋佢哋嘅自家製醬汁嚟食呀，雖然有啲辣，但令到隻蝦除咗彈牙爽口之外，再多咗個層次。如果你夠好彩嘅，仲會遇著係雪人造型嘅生蝦。點解係要夠好彩？因為唔係次次都咁樣樣裝飾㗎，有眼有鼻咁都幾有童真。仲有甜食芒果糯米飯，啲糯米飯質感黏軟，唔太硬，又充滿椰香，重點係，呢度用嘅係白糯米唔係黑糯米呀！BTW，重點之中嘅重點係咩？係平呀！3個人6個餸都係每人大約百四蚊咋！

餸多過麵 車品品小食

Photos by T.LAU914 & CutePoPoLoK
長期排長龍嘅車仔麵店，不過如果你食過嘅話，就會明白點解咁多人等咁耐都仲肯企喺痴痴的等到夜深。因為佢啲車仔麵堅係足料！材料嘅配搭選擇太多，懶得諗嘅可以嗌個大雜燴，咁就可以一次過食到牛腩、芝士腸、紅腸、豆卜、魚旦、豬大腸、牛柏葉、蘿蔔等等超過十種餸，湯底可以揀咖喱汁或者腩汁，老闆娘仲好好招呼㗎，除咗介紹你啲嘢點食法之外，見你碗麵唔多夠水仲會幫你加湯！

除咗嚟食車仔麵，仲可以叫多碗碗仔翅，一樣都係咁足料，肉絲冬菇絲粉絲木耳絲乜絲都有，係大滿足嘅。想再滿足啲都仲得，叫埋碟原隻鮑魚吖，48蚊咋，都幾厚身幾大隻㗎，食落亦都彈牙，用埋個鮑魚汁嚟食麵或者翅都得。另外，一場嚟到，不妨再嗌多份出面比較少食到嘅魯肉餃，皮薄餡多但又唔會穿，果然係有自己方式去包餃，面頭仲撒滿好多蝦籽，食落又甜又香，正呀喂！

平民好西餐 金船長餐廳

Photos by 小新與愛麗絲 & mohkc
秋冬必食嘅食材，一定唔少得黑松露！黑松露除咗用嚟配意粉、小菜或者甜品之外，仲可以用嚟整Pizza！呢間出名食黑松露pizza嘅餐廳，雖然佢嘅pizza個樣一啲都唔似pizza，你話係麵包、夾餅或者熱香餅其實仲似，但佢的而且確係「黑松露馬卡斯芝士夾心薄餅」！喺兩塊脆卜卜嘅餅皮中間，夾住一層厚厚嘅黑松露同芝士，就咁成嚿食又得，淋埋啲秘製醬汁先食又得，再唔係夾埋啲西式豆芽菜喺裡面食都得，有咁多塊，咪一塊一種方法囉！我好識食？個侍應教㗎哈哈~

餐廳另外仲有芝士洋蔥煙肉廣島蠔、西冷牛扒、鵝肝多士、蜜糖焗豬手等等西餐食，食完之後仲食得落嘅，可以叫埋個疏乎厘呀，漲卜卜、軟綿綿，有四款口味揀㗎：原味、朱古力味、橙味、薑味！同埋，佢算係平民價錢嘅西餐廳，小巿民福音呀！

B612星球甜食 小王子甜品

Photos by jenny_jls & 蒨沂
食完飯通常都會搵多間餐廳食甜品，大角咀絕對有齊一條龍服務。呢間甜品店位於大角咀小巷，但以小王子做主題令佢成為漆黑中嘅螢火蟲，飯後時間經常都要等位。

一入到去，就好似去咗小王子嘅世界咁，有玻璃罩住嘅玫瑰花、有小王子、有飛機、有「星空」，仲有成個櫃裝咗好多唔同譯本同版本嘅《小王子》著作……應該係腦細嘅珍藏啩。

講返啲甜品，宇治金時心太軟絕對係抹茶控嘅首選！個心太軟係星形㗎（不過有時好似係心形），一切開啲抹茶漿就湧晒出嚟，都幾澎湃，食落好有抹茶味但又唔會話好苦，而個蛋糕亦都幾鬆軟。另外有個oreo木糠布甸就整到成朵花咁，個布甸係花冧，外面再用朱古力醬畫返啲花瓣，啲cream軟滑得嚟仲夾雜住啲朱古力脆脆。仲有蜂蜜玉桂香蕉原味窩夫甜得嚟，又唔會令牛奶味同雞蛋味冇掟企，個窩夫仲脆卜卜添。講真，分分鐘部相機仲食得飽過我，不過我要求高，如果啲甜品可以再「小王子化」就好喇！

文：Kar

隨時接收最新資訊
讚好OpenRice專頁！