「你肚唔肚餓呀？我煮個麵你食吖？」呢個台灣拌麵同食開啲公仔麵唔同㗎，啲麵條全部手工製，整完仲要曬足兩日，每兩個鐘翻一次咁，好多工夫下。而最近，呢款拌麵喺香港都可以搵到嚟食啦。

食過嘅朋友都會知道，佢哋有兩種麵：椒麻拌麵、蔥油拌麵，麵質彈牙、煙韌。有間由米芝蓮星級大廚主理嘅灣仔法式小酒館，同佢哋聯乘合作，推出拌麵pop up吧，去到就可以試到兩款由大廚炮製嘅限定菜式，食得辣嘅可以揀炒安格斯牛肩肉配煎蛋 x KiKi椒麻拌麵。啲牛煎得好香，而個椒麻拌麵，係有啲辣，喺喉嚨度辣返出嚟，而食完之後，條唇仲真係會有啲麻嘅感覺。不過撈埋啲蛋汁一齊食就可以減緊少少辣嘞。

唔食得辣嘅朋友就有63°C溫泉蛋配炒雜菇 x KiKi蔥油拌麵。香蔥味係幾醒神，一下拮穿隻蛋嗰下好過癮，任由啲蛋汁流落個麵度，幾治癒。

另外， 果汁品牌Water Juicery亦特地為拌麵設計咗隻新口味嘅冷壓果汁，係由西芹丶菠蘿同薑調配而成，味道都幾複雜下，一飲就飲得出啲西芹味！果汁酸酸甜甜，又有啲果香，最尾會有啲微辣。

幾款限定菜式係期間限定嘅，不過暫時都未定會限到幾時啊。

Atelier Vivanda
地址：灣仔船街9號地下A舖

文、相：Kar