喺銅鑼灣返工嘅朋友，嚟緊又多一間新店畀大家去試啦！呢間伊比利亞火腿專門店喺利園三期開咗間Tapas Bar & Café，主打全日供應西班牙Tapas、高質橡果餵飼伊比利亞火腿同House Blend阿拉比卡咖啡。最特別嘅係連廚師發辦都有！
 

Reserva Ibérica Tapas Bar & Café係品牌喺香港嘅第三間分店，特別加入ABC概念：A指All-day Tapas，B係Best Bellota，C代表Custom-made Café experience。
 

All-day Tapas+廚師發辦

經典西班牙法包三文治配迷你西班牙凍湯（$78）

Tapas Bar全日供應唔同種類嘅西班牙Tapas，選擇多達50款。附近上班一族可以考慮呢份法包三文治，用法包夾住西班牙辣肉腸、墨西哥辣椒、洋蔥同蕃茄，香辣醒神。夏天供應嘅凍湯會以清新食材為主，例如青蘋果、青瓜、西芹等等，素食者都可以享用。
 

豪華版12”開放式西班牙法包三文治配迷你西班牙凍湯（$188）

想食豪啲？可以「升呢」做呢份專為新店而設計嘅巨型法包三文治！當中有八款西班牙特色食材，即係白毛豬火腿、沙甸魚、白鯷魚、鹽醃鯷魚、蟹肉、蝦、西班牙辣肉腸同豬肉。一次過試哂唔同滋味。
 

伊比利亞火腿拼盤配西班牙蕃茄多士（廚師發辦 每位$688/起）

而晚市會供應Cocina de Mercado，翻譯成中文就係市場時令食材，同日本嘅廚師發辦有異曲同工之妙。廚師會根據客人口味同當日新鮮同時令食材發揮創意，供應8道菜套餐。嚟到伊比利亞火腿專門店，當然要一試品牌皇牌火腿拼盤！
 

西班牙竹籤小食（廚師發辦 每位$688/起）

廚師發辦包括唔同特色Tapas，好似Pintxon即係以竹籤串起法包同各種配料，拍攝當日就有白鯷魚伴西班牙紅甜椒同煙三文魚伴烤紅洋蔥兩款。
 

炸伊比利亞火腿薯蓉丸子（廚師發辦 每位$688/起）

選用伊比利亞火腿比較多筋嘅部分製成火腿蓉，再加火腿粒同炸薯絲增加口感層次，上面嘅蕃茄沙沙味道清新，平衡油膩感，香而唔太膩。
 

Best Bellota

Reserva Ibérica品牌有超過40年歷史，嚴選100%橡果餵飼同100%放養嘅伊比利亞火腿。而且會選購伊比利亞各個地區唔同特色嘅伊比利亞火腿，畀各位更多選擇。
 

例如橡果餵飼百分百伊比利亞火腿Guijuelo（60個月）味道會比較強，適合鍾意火腿鹹香，同入口即溶口感嘅老饕。而郊外穀飼百分百伊比利亞火腿（38個月）勝在油脂分佈更均勻，香味十足。
 

 
Custom-made Café experience

西班牙咖啡馬天尼（$88）

新店特別調配House Blend百分百阿拉比卡綜合咖啡，有專業咖啡師幫大家選擇咖啡配搭，而且仲有供應一系列西班牙調酒咖啡！例如呢杯咖啡馬天尼唔單止有Vodka，仲有餐廳House Blend Espresso同Licor 43西班牙橙酒，泡沫口感特別，味道有啲似朱古力橙餅。
 

加那利亞群島咖啡（$88）

呢杯有四層唔同顏色嘅其實係西班牙人度假熱點加那利亞群島嘅特色特飲，四層由面到底分佈係撒上肉桂粉嘅奶泡、House Blend Espresso、Licor 43西班牙橙酒同煉奶。影相打卡後記得搞勻先飲，味道偏甜但同時又有酒香，略嫌咖啡香有少少被蓋過。
 

西班牙咖啡啤酒（$88）

咖啡酒當中以呢杯Coffee Beer比較易入口，上層係House Blend Espresso配搭有氣礦泉水以增加Sparkling口感，下層係Licor 43西班牙橙酒加添酒香。有無發現咖啡酒都會配一杯水？呢杯唔係普通嘅水，而係經過過濾嘅軟純水，幫大家洗洗味蕾，方便品嘗咖啡真味。
 

Cava Bertha Cardús（60months）（$498/支）

Reserva Ibérica Tapas Bar & Café
銅鑼灣新寧道1號利園3期3樓316-318號舖
*2018年7月18日15:00開幕

文、相、片：Cathy