聽聞少幾次日本就可以買到樓，所以最近開飯仔都去少咗日本，做唔做到樓奴就唔知，我淨係知我好掛住日本美食，尤其啲家庭式美食，好簡單但有日劇裡面家嘅溫暖。又畀我搵下搵下，發現香港都有呢種帶有日本媽媽風味嘅家庭料理！今次同大家介紹七間日本家庭式食堂，一齊慳返啲機票錢留港歎日本住家菜。
店鋪雖小 美食俱全 東京食堂
相信唔少人對東京食堂比較出名嘅鰻魚定食已經略有所聞，其實呢到仲有其他日本家庭式料理都好值得一試，鹽燒鯖魚燒得恰到好處，鰻魚炒飯炒得均勻，蟹肉忌廉薯餅炸得香脆，實在令人垂延三尺。店鋪座位較少，比較適合三兩知己一齊嚟食，加上呢度係開放式廚房嘅設計，同朋友一邊傾計一邊睇住廚師用心烹煮料理，的確係一件賞心樂事。
慢煮七個鐘健康咖哩飯 坐忘
呢間日式西餐廳由來自日本嘅藤田夫婦經謍，提倡多菜少肉，一人每日要食350克蔬果，所以佢哋有個「一日野菜拉麵」同「一日野菜咖喱」，入面有茄子、蓮藕、南瓜、椰菜花、車厘茄、三色椒、翠玉瓜等共12種蔬果，老闆每日去街市挑選，包保新鮮；其他飯麵都係堅持七成菜三成肉，另外最多人叫嘅七小時慢煮豬軟骨飯份量驚人，煮腍晒嘅豬軟骨咬落去成口都係骨膠原，飯入面亦會配上南瓜蓉同粟米，口感豐富，難怪食客都話喺到食飯係「大確幸」。
元朗煙韌烏冬小店 鈴夏食堂
（圖： Nikita_cheung、糖小妹）
元朗呢間新開只有幾個月嘅鈴夏食堂主力賣手打烏冬同咖哩飯，店舖內嘅食物選擇唔多，但以小店嚟講亦算可以接受。咖哩烏冬賣相討好，濃厚嘅咖哩湯底配上少量野菜，整體份量偏輕盈，奶油烏冬嘅味道比較有驚喜，每條烏冬都可以完整沾上忌廉汁，令人食完充滿罪惡感。由於呢到嘅烏冬經熟成三日，相對讚歧烏冬，較硬同粗身，更有咬口，同街外食嘅烏冬幾唔同。
文青日式食堂 屋子生活
屋子咖啡喺烏溪沙港鐵站附近，雖然位置比較偏遠，入到去見到餐廳環境就知值回票價。坐喺落地大玻璃隔離嘅榻榻米，叫個日式定食，享受下慢活嘅感覺，連日常嘅工作煩惱都會輕易唔記得晒。食物賣相一流，包你影足半粒鐘都唔怕悶，定食味道唔算突出，但甜品就做得唔錯，清酒香梨荔枝窩夫清甜可口，啱晒鍾意食甜品嘅女仔。
日本夫婦親自主理 嘉兵衛
（圖：Nikita_cheung）
元朗呢間嘉兵衛出名晚市一定要提早訂位先有得食，咁多捧場客都係因為佢哋對製作食物有一份堅持。呢到所有食物都係由一對日本夫婦親自主理，將佢哋日本家鄉嘅風味帶到食物裡面，雖然唔係用頂級食材，但就可以感受到日本家庭嘅温馨。吉列豬扒滑蛋丼、名古屋單骨雞翼，仲有多款日式定食，全部都係可以令人諗起日本媽媽嘅家庭料理，好滾動啊！
令人黯然燒魂嘅鰻魚飯 尾張屋
身為紅磡人氣日本料理三河屋嘅另一分店，同樣喺紅磡嘅尾張屋論價錢同食物質素亦同三河屋差唔多，然而尾張屋座位比較多，通常都唔洗等咁耐。呢到嘅價錢非常親民，食物賣相可能唔及一般嘅日本料理咁精緻，但味道就一啲都唔輸蝕，唔少食客就推介呢到嘅蒲燒鰻魚飯，鰻魚超肥美，加上入晒味嘅鰻魚汁同鰻魚邊燒到輕微脆口，真係諗起都流口水。
街坊價用心小店 櫻川丼
如果想平平地食返餐街坊日本料理，櫻川丼會係一個唔錯嘅選擇。七八十蚊就可以有成個套餐，有前菜、主菜、甜品同飲品！有人話米飯係成餐飯嘅靈魂，要睇間餐廳有無用心相信喺米飯可以睇得到，有食客就話呢到嘅珍珠飯焗得啱啱好，雖然係家常味道，但用心煮嘅野食總係會帶俾人最窩心嘅感覺。
文：Dap
其他精選文章推介：
最後衝刺 2016年尾5式漢堡大熱跑出
餃乜鬼咁好食？餃子店大晒冷
【開飯餐廳專訪】荃灣人氣米線店老闆：「我唔做快餐米線」 排長龍都要逐碗煮
文：Dap
其他精選文章推介：
最後衝刺 2016年尾5式漢堡大熱跑出
餃乜鬼咁好食？餃子店大晒冷
【開飯餐廳專訪】荃灣人氣米線店老闆：「我唔做快餐米線」 排長龍都要逐碗煮
讚好OpenRice專頁！