地獄廚神Gordon Ramsay旗下嘅Bread Street Kitchen & Bar最近喺山頂重開，餐廳主打悠閒風格嘅英式歐陸菜，唔少都係英國人嘅Comfort food，好似提到英國菜就唔少得嘅炸魚薯條咁，最啱三五知己分享。
 

餐廳相當寬敞，亦有半開放式廚房令客人可以欣賞主廚Gareth Packham同佢團隊嘅手藝。裝修既有之前中環店嘅英國工業風元素，亦有現代氣息。餐廳另有全素、無麩質、小童菜單，非常貼心。
 

烤帶子（$138）

頭盤選擇已經令人眼花繚亂，呢碟烤帶子就係最考驗廚師功力嘅菜式之一。將北海道帶子煎至外面香口又保留裡面嘅鮮甜嫩滑，咬落仲有少少Juicy。上面係蘋果果泥，酸香令帶子食落更清新。相反鍾意重口味嘅朋友可以連埋隔離嘅西班牙臘腸Chorizo碎一齊食，甜辣醒胃。
 

煙燻生牛肉他他（$128）

牛肉他他沿用傳統配方，加入酸豆同生蛋黃等撈勻一齊食，口感滑溜之中又有牛肉嘅彈性，帶少少煙燻香氣，惹味開胃。同一般配麵包唔同，呢度配搭自家製嘅香脆墨西哥玉米片，更啱送酒！
 

炸魚薯條（$198）

餐廳招牌菜式之一，全自家製作。炸魚選用可持續生產嘅時令魚肉，好似呢期就係嚟自波羅的海嘅鱈魚，炸漿就用全球Bread Street Kitchen & Bar分店統一嘅配方。金黃色嘅炸皮比較硬身，但夠薄所以食落脆口，魚肉嫩滑入味。
 

炸魚同手切薯條配上青豆蓉同咖喱醬，青豆蓉以牛骨髓提味，幼滑香棉。而配咖喱醬就係主廚Gareth出生地曼徹斯特嘅地道食法之一，咖喱醬辣度唔高，以香料味為主，比較稀身唔會搶走魚肉鮮味。
 

香炸水牛城雞扒漢堡（$158）

呢個漢堡就係山頂新店新加嘅菜式，靈感嚟自水牛城雞翼，唔難估到醬汁當然有水牛城雞翼必備嘅Frank's辣醬同藍芝士醬，鹹辣惹味。雞扒選用法國黃雞嘅雞胸肉，外脆內滑。自家製麵包亦相當鬆軟。
 

 

伊頓草莓忌廉蛋糕（$68）

伊頓蛋糕Eton Mess係英國傳統甜品，以士多啤梨、蛋白霜同忌廉為主，呢度嘅版本再加入士多啤梨果蓉，忌廉亦特別選用Double Cream製作，令呢道甜品味道更為濃郁！蛋白餅非常輕身而富空氣感，幾乎係入口即溶。士多啤梨果蓉、果肉同忌廉酸甜味道平衡。
 

（左）I Bet You Look Good On The Dancefloor，（右）Love Potion No.9（各$118）

叫得Kitchen & Bar，呢間餐廳同時亦係一間酒吧，供應多款特色雞尾酒、無酒精雞尾酒、紅白酒、啤酒等等。I Bet You Look Good On The Dancefloor個名就夠得意，其實係以Sailor Jerry香料冧酒為基底，配搭新鮮西瓜、青檸汁等，較為Fruity。Love Potion No.9就係Graham's Ruby 缽酒加入檸檬汁、覆盆子等，亦相當易入口。
 

Bread Street Kitchen & Bar
地址：山頂山頂道118號山頂廣場地下G02號舖

文：Cathy
相、片：Tom Li