由入行逾25年嘅中菜師傳坐鎮，但唔係食中菜，而係新派泰國菜呀！呢間新晉嘅餐廳，佈置走西式風格，而一系列泰國菜就融入中式元素，加埋泰式雞尾酒，予人耳目一新嘅感覺。

冷盤前菜+沙律

泰式青醬牡丹蝦（$328/4隻）、泰燒汁八爪魚（$148）

泰國菜必食嘅生蝦，師傅轉用爽口同更鮮甜嘅刺身級牡丹蝦，本身已經淋上泰式青醬，但另外仍配一個傳統泰式醬汁，主要以虎皮椒、泰國辣椒製成，味道鹹辣得嚟好提鮮。

而泰燒汁八爪魚嘅外型有別於常見嘅沙律，其實八爪魚片下係一件件西瓜。西瓜先用酸甜味泰式汁醃製，減退咗少少水果嘅清新風味；上菜時再淋上泰式青醬，八爪魚同西瓜一齊食，入口juicy，帶香茅氣息。

惹味特色主菜

摩登海鮮冬蔭功（$328）

鮮蜆分量較多，有啲驚喜

冬蔭功湯用中式煮法可以凸顯海鮮鮮味？師傅話除咗每煲湯都用半斤蝦同一條鰂魚熬煮湯底，鰂魚重好似煮中湯咁，先煎透再入煲，所以味道濃厚。湯底煮好再加入南薑、香茅、辣椒等材料，既有適當嘅酸辣度同香料味，又唔會蓋過海鮮味道。另外虎蝦、魷魚、青口同蜆分量幾多，一份可以3至4人share。

冬蔭功脆皮燒雞（$298/半）

雞肉充滿冬蔭公香氣，但唔會過辣

傳統當紅炸子雞出名皮脆肉滑，而呢道燒雞沿用相同做法，比一般焗製嘅泰式燒雞脆皮。雞隻以秘製冬蔭公醬醃製一晚至入味，待風乾後再炸，然後拆肉上碟，方便夾起配泰式蝦片一齊食。

香茅檸檬葉烤魚（$368）

原條魚以粵菜油泡方式烹調，外皮特別脆口，加上師傅選用厚肉嘅筍殼魚，食落啖啖肉。淋上自家調配嘅香茅檸檬汁，甜酸開胃，好啱佐酒。

金沙麥皮蝦（$268）

加入新加坡風味菜式，係為咗照顧食唔到太辣嘅朋友，提供多一個選擇。大大隻虎蝦沾上脆卜卜嘅麥皮同鹹蛋黃醬，鹹鹹香香又唔會好油膩。

咖喱系列

紅咖喱香蕉雞（$268）

咖喱係泰國菜不可或缺嘅菜式，以傳統方式製作嘅紅咖喱香蕉雞，特別加入香蕉，味道比一般紅咖喱香甜又和。

午市精選 - 青咖喱和牛面頰珍珠香米（$148）

現時選用澳洲和牛入饌嘅青咖喱和牛面頰，肉質軟滑易咬開，配上茄子等配料，送飯啱晒。

甜品+飲品

黑糖椰子雪糕（$68）、招牌Mue Thai（$108）、抹茶香蕉乳酪沙冰（$48）

呢度嘅甜品必試黑糖椰子雪糕，配料豐富之餘亦花上心思，好似當中嘅「涼粉」其實係用竹蔗茅根煮湯再冰藏而成，重有自家配方製嘅椰子雪糕，加埋桃膠、龍眼肉等，一份甜品就有多重口感。

泰式雞尾酒之中，梗係要試以店名為名嘅Mue Thai～五香Rum酒作基底，混合肉桂同橙酒 又帶出清爽口感，再加入用花椒、八角、丁香等5款香料製成嘅自家製五香糖水，感覺好似泰國菜咁，充滿香料氣息。

如果想fresh啲，沙冰係唔錯嘅選擇。抹茶香蕉乳酪沙冰口感扎實，明顯落足料，味道酸爽，但抹茶味唔算好突出。

象牙白色主調配半圓形卡座，設計摩登時尚

室內設有唔同區間、獨立房間

戶外雅座地方寬敞

Mue Mue
地址：尖沙咀彌敦道132號美麗華廣場1期3樓302號舖

文：Cathy
相、片：Yan Yan