尖沙咀亞士厘道附近，有各式酒吧同日式餐廳，而呢間新店就集合以上兩個元素，門面設計成開放式酒吧，行入去則為用餐區，可以舒舒服服嘆西日Fusion菜、壽司、串燒等菜式，而裝潢同餐飲擺盤都好啱打卡～

餐廳由入行15年、主要製作日式Omakase嘅師傅主理，菜式集創意同傳統風味

創意冷盤

魚子醬帆立貝金槍魚芒果塔（$328）以自製芒果醬、士多啤梨醬同牛油果醬伴碟

呢款刺身塔色彩豐富，底層嘅北海道新鮮帆立貝同金槍魚，撈咗芥末同秘製沙律醬汁；然後依次放上香甜嘅香芒肉、松葉蟹肉同大量時令日本魚子醬，最後以食用銀箔作點綴。入口清新微酸，鮮味又唔會太鹹，如果伴碟嘅3款果醬可以每點大粒啲，就更易撈埋一齊食喇。

帆立貝鮭魚蜆味啫喱奶霜（$128）

用酒杯盛載嘅帆立貝鮭魚蜆味啫喱奶霜，製作需時，先用大量新鮮大蜆熬煮清甜嘅高湯，再冷凍成啫喱；配上用昆布醃製嘅北海道帆立貝、火炙三文魚，以及調配成味道微鹹嘅忌廉。成個配搭清新中帶點鹹鮮，再咬爆三文魚籽則會瞬間提味。

特色菜餚

伊勢海老入船佐蟹膏蝦膏醬（$688）

配鹹香嘅蟹膏蝦膏醬

溏心蛋食得多，溏心龍蝦你又試過未呢？師傅以900度高溫，快速炙燒大約12両重嘅伊勢龍蝦，令龍蝦肉表面帶點焦香，內裡則介乎半熟嘅溏心質感，彈牙又啖啖肉；再蘸用龍蝦膏同松葉蟹膏調配而成嘅自家製醬汁，令鹹香味更濃郁。另外，砌成船狀嘅龍蝦殼都燒至脆卜卜，蝦腳通常可以食埋，如果遇上剛換殼嘅龍蝦，連蝦身嘅殼都食得！

Afternoon Tea（$368/2位用）

製作壽司飯嘅赤醋，選用釀製最少3年嘅江戶前赤醋，再加糖同鹽調味，酸度適中

日式Afternoon Tea～呢款2人前下午茶套餐，包括6款時令壽司、2款（共4串）串燒、1款小食同2杯飲品。時令壽司用來自日本嘅飛機魚製作，開飯仔拍攝當日有（圖左起）昆布帶子、章紅魚、赤身、赤蝦、象拔蚌同金目鯛；其中章紅魚係比較少出現到嘅款式，赤身則較高機會再次食到。但6款壽司冇重複配置，可能要同朋友猜拳決定邊個食邊款喇～

套餐內有10款串燒可以揀，例如宮崎黑豚豬腩、薩摩雞尾串、燒蘆筍等；指定小食則為脆口嘅紫菜白飯魚干，好啱佐酒

下午茶配嘅飲品，揀cocktail亦無需加錢

飲品方面，開飯仔推介大家試Matcha With You（圖左），靈感來自台式茶飲，用伏特加、Baileys同抹茶調配，面頭再鋪上奶蓋，香甜得嚟易入口。另外Meguro Sakura（圖右）則以日本目黑縣嘅櫻花為題，用清酒、雜莓、蘋果汁同櫻花味糖水做基調，配上粉紅色沙冰，打卡之餘，酒精濃度唔高，適合女士飲用。

魷魚一夜干（$98）

餐廳有多款串燒同燒物，其中魷魚一夜干坊間少見，製作方法同喜之次一夜干大致相同，但用鹽水浸過後，要花3日風乾，時間較長，而且冇加麵豉醬醃製，會呈現魷魚本身嘅顏色。燒嘅時候只掃上味醂，入口一啲都唔乾，重好爽口彈牙𠻹。

牆身以刺青風格圖案作裝飾

店門位置設計成開放式酒吧

焰 
地址: 尖沙咀亞士厘道35號地下B號舖

文：Cathy.Ｃ
相、片：TOM