各位牛魔王試咗呢個新場未？講緊大圍呢間10月新開嘅日式燒肉店呀，自己有熟成櫃擺放熟成牛肉 ，由從日本、澳洲等地入口唔同高等級和牛。供應刺身、壺漬、拼盤等，M9肉眼二食更加食到唔同口感！配埋杯清酒，一樂也。
 

616燒肉酒場開喺大圍港鐵站附近，裝修甚有日本氣氛，加上音樂氣氛唔錯。唔單止用平板電腦點單有齊相睇，旁邊仲有熟成櫃同雪櫃，擺滿餐廳自家熟成牛肉 ，同唔同和牛部位，一清二楚。
 

A5三角肉刺身（$98）

先嚟一碟和牛刺身，三角肉即係牛前面嘅肩胛肉，油脂較多所以做到入口即溶嘅柔軟口感。餐廳特別搭配柚子漬物，食嘅時候記得將刺身捲起，同柚子同蔥一齊食，滿嘴脂香而唔過膩。
 

M9+肉眼連上蓋兩食（厚切200g $488）

單價睇落的確唔算平，但M9級數嘅澳洲和牛有佢嘅可取之處：食落肉香濃郁，油花分佈無日本和牛咁細緻，但亦夠均勻可以帶出脂香。所以建議大家豪少少點200g同幾個朋友一齊Share。
 

兩食嘅意思係分肉芯同上蓋兩款燒法，師傅會幫大家將肉眼剪開，肉芯剪成肉條燒至半熟，牛肉香味濃郁，口感Juicy但帶少少筋。再食剪成一粒粒嘅上蓋，上蓋肉會明顯更軟腍更多汁，而且無咗帶筋嘅缺點，非常值得一試。
 

和牛七點盛（$798）

心大心細唔想揀，除咗請教師傅之外，亦可以點拼盤試勻哂唔同部位搵出心水。呢份和牛七點盛就有齊肉眼上蓋、澳洲和牛舌、A5三角肩、牛臀肉、牛腹肉、牛肋肉同沙朗，各自有唔同嘅口感同配料。
 

如果同開飯仔一樣自問唔係燒肉高手，可以請師傅按味道淡至濃嘅順序幫大家燒嘅。肉眼上蓋帶少少筋，油脂香一般但勝在相當多肉汁。和牛舌爽口唔韌，點少少玫瑰岩鹽就足以帶起肉味。三角肩切成粒狀鎖住油脂同肉汁，食入口油花就即刻融化。
 

牛臀肉可以配蛋汁一齊食增加柔滑口感，牛腹肉就已經用芝麻醬食落口感軟腍帶甜味。牛肋肉燒香後更加加上海膽一齊食，因為牛肋肉肉質較軟，同海膽嘅口感最夾，鮮味立刻升呢。沙朗油脂最多所以留喺最後食，同樣有入口即溶感。
 

 

A5牛肋條（$168）

壺漬牛肋條伴以乾冰上枱，大家記得把握時間相機食先！唔好以為得賣相出色，牛肋條先醃漬帶起甜味，而牛肋條即係肋骨之間嘅條狀肉，油花多所以可以燒出脂香，其實同港式叉燒有啲似！
 

點少少燒汁食嘅話，甜味醬汁加上肉香同油脂嘅甘香，的確頗有叉燒嘅感覺。特別係帶少少燶嘅邊位，更加香口！
 

獺祭50 純米大吟釀（250mL $188）

食油脂比較多嘅燒和牛，最啱配返杯帶少少辛辣嘅清酒。初入門可以先試呢壺獺祭50，入口先有一陣花香同米香，最後先有一絲辛口感。比較柔和同清爽，非常易入口又可以一洗口腔裡面嘅油膩。細細聲話埋畀大家知，最近餐廳有21:30後啤酒同250mL壺裝清酒買一送一優惠呀！
 

冰話梅小番茄（$28）

解膩另一個方法就係食啲清新小食，呢碟小番茄夠哂酸、甜、冰、爽，咬落仲有小小爆汁效果，食一粒即刻Refresh咗。
 

綠茶布丁（$18）

最後想滿足埋甜品胃？無問題，原來呢間燒肉店其中一位廚師之前做開Omakase，無嘢難得到佢。布丁食落都幾濃茶味，雖然無抹茶嘅回甘但勝在茶香清新，口感Creamy。
 

616燒肉酒場
地址：大圍積福街60-62號好時洋樓地下4-5號舖

文、相、片：Cathy