各位食雞嘅雞迷，新加坡米芝蓮推介美食嘅海南雞飯店啱啱進駐咗九龍啦，以後唔使過海都有得食。新舖除咗有新菜式之外，仲有新店獨有嘅奶蓋茶同養生茶系列，grab and go都得，附近上班族嘅下午茶同「萬歲」請客有新選擇啦~

同銅鑼灣店一樣，都係一間舖內有齊「天天海南雞飯」、「五十年代」、「老街坊」、「超好面」四個品牌嘅出品。招牌海南雞飯當然繼續有啦，配上濃稠黑醬油、自製辣椒醬、薑蓉醬，雞滑飯香，飯粒中仲滲出淡淡薑香。

不過，開新舖點可以冇新嘢？嚟緊介紹嘅呢兩鹹兩甜菜式，會同時喺兩間店推出。開胃小食酒糟 四寶好鬼香，一上菜就有陣陣花雕酒香飄入鼻。四寶分別係雞肝、雞腎、無骨雞翼同無骨雞腳，酒香肉爽。

新加坡出名肉骨茶，而新菜和牛骨茶就係肉骨茶嘅升lvl版啦。以日本和牛肉、牛肋骨、牛筒骨加多種藥材等熬足4個鐘，湯底嘅牛肉味相當濃郁，比起平時嘅肉骨茶肉香更重，牛魔王要試。

對於香港人嚟講，食完飯食甜品是常識吧。呢度都有自己嘅特色甜品，分別係咖椰鍋餅同榴槤炸湯圓。前者嘅班戟皮煎得香脆，內餡夾住嘅甜甜der咖椰醬；至於後者，榴槤控絕對會愛上。呢粒炸波波，中間嘅餡係D24榴槤蓉啊，連埋混入斑蘭汁搓成嘅皮一齊食，清香而不膩，好想食完一粒再一粒。

如果有去過銅鑼灣店嘅朋友就應該知道，嗰邊嘅飲品主要以cocktail為主打，而呢邊，就係近期大熱嘅鮮果茶、奶蓋同養生系列。每杯都落足料㗎，鮮果茶以鮮果肉製作，而養生系列好似木瓜綠茶咁，仲真係有幾嚿木瓜同雪耳喺入面，可以拮埋嚟食。呢排天氣開始乾燥，要滋潤下啦。

至於奶蓋，用嘅係北海道牛奶，奶味自然濃香，而且最後灑上岩鹽，令到芝士鹹香更突出。芝芝果果呢杯，相信會係好多女士嘅飛佛，一嚟健康二嚟香甜，口感creamy。

仲有呢支純米酒，天天sake，好清爽，完全唔似平時啲sake咁辛辣，就算係女生都唔會抗拒。細細支一餐實飲得晒。當然，如果你係好酒之人，就揀大size嘅先滿足到你哋啦。

天天海南雞飯
地址：尖沙咀柯士甸道西1號圓方1樓1050A號舖

文、相、片：Kar