喺日本開業39年，於當地擁有超過600間分店嘅燒鳥品牌鳥貴族，繼美國、台灣同韓國開設海外分店後，終於開到嚟香港喇！餐廳現時試業中，將於12月16日正式開幕，嚟到可以感受有活力嘅居酒屋風格之外，品牌亦想帶出佢哋適合一家大細嚟食。唔同部位嘅雞肉串燒當然係焦點菜式啦，另外亦有多款前菜、炸物、即煮崟飯、經典甜品、香港限定品等等。

雞肉串燒、特色菜、飲品等合共過百款選擇

燒鳥系列

店內即燒

供應多款雞肉部位、內臟串燒

香港店所有串燒一律$29.9/份，除咗招牌貴族燒係一份一串之外，其他都係一份兩串，相比日本360円/份（稅後）雖然貴少少，但喺香港都算係定價親民。

鹽燒雞胸貴族燒（左）、醬燒雞腿貴族燒（右）

招牌貴族燒設有雞胸、雞腿選擇，官方表示每串長達21cm，目測感覺差少少，但拎上手都有啲分量。呢兩款可以自選口味，包括鹽燒、秘製醬汁同香辣口味，建議雞胸揀醬燒會juicy啲。

鹽味麻油燒雞肝（左）、醬燒雞心（右）

燒鳥又點少得內臟款式呢～如果自問鍾意重口味，不妨試吓鹽味麻油燒雞肝，配上蔥蒜再蘸醬汁，味道香濃。而醬燒雞心就好抵食，一串已經有五粒呀！

左至右為鹽燒雞胸脆骨、鹽燒雞中翼、秘製醬燒芝士雞肉丸

好多人食串燒都會揀免治雞肉串，雖然呢度冇，但有類似口感嘅秘製醬燒芝士雞肉丸，仲有芝士增加一點甜味，平衡醬燒嘅鹹香感。

主食

貴族雞釜飯

主食提供飯麵選擇，而貴族雞釜飯係開飯仔首選，因為真係上枱即煮（30分鐘），嘆熱辣辣嘅飯呀！北海道米煮好後夠入味，飯粒濕潤，加入雞肉、牛蒡等配料，小朋友都啱食。

特色菜+小食

鐵板烤山藥蓉

南蠻炸雞

特色菜都有健康選擇！平時見到嘅日式山藥蓉多數係凍食，而呢款就用鐵板烤，拌勻海苔、鵪鶉蛋等配料，鹹鹹哋幾啱拌飯。而脆口小食非南蠻炸雞莫屬，大件脆口夠滋味。

柚子醋枝豆伴小貝柱

食咗咁多肉可能會有少少飽滯感，香港限定嘅柚子醋枝豆伴小貝柱冷盤拌入微酸嘅柚子醋，加上鮮味嘅小貝柱，酸爽嘅感覺可以refresh一下。

特色甜品+飲品

抹茶蕨餅配雪糕

巨蛋雪糕提供醬油甜醬同士多啤梨醬

香港限定嘅抹茶蕨餅配雪糕有驚喜，雪糕嘅牛奶味幾突出，蕨餅就口感偏軟身，連埋cream一齊食，口感豐富。另外巨蛋雪糕就有啲大福，呢款嘅麻糬皮相對硬少少。

果汁、梳打、酒款樣樣齊

左至右為柑橘甜橙果酒、混合果汁、濃厚朱古力牛乳

飲品加入香港限定嘅果茶，包括熱情果、蜜桃、荔枝三款口味；而柑橘甜橙果酒同混合果汁都好fresh，前者有香橙嘅酸甜感，後者就充滿果甜味道，小朋友都一定鍾意。

香港餐牌

香港餐牌

鳥貴族
地址: 屯門屯順街1號屯門市廣場1期1樓1108-1111號舖

文：Cathy
相、片：Tom