抹茶控有好消息：又有一間日本抹茶老店進駐香港！呢個品牌已經有過百年歷史，主打招牌深蒸煎茶同淺火焙茶。尖沙咀旗艦店仲會有齊堂食、外賣同禮品，得閒嚟買杯抹茶雪糕行街食得，坐低食返杯芭菲再掃埋抹茶零食亦得，得咗。
 

（左）抹茶芭菲 $88，（右）焙茶芭菲 $88

宇治園首間香港分店試業中，先帶大家睇睇堂食Menu。最搶眼嘅一定係呢兩杯芭菲。抹茶芭菲有齊抹茶樹葉形脆餅、白玉、自家製抹茶軟雪糕、玄米脆粒、紅豆、玄米脆片、抹茶蛋糕、忌廉同自家製抹茶啫喱，層次豐富。
 

抹茶啫喱 $78

焙茶啫喱 $78

想Light啲嘅話就可以嗌抹茶啫喱或者焙茶啫喱，有軟雪糕、啫喱、白玉同紅豆。抹茶軟雪糕食到淡淡抹茶清香，啫喱滑溜。而焙茶軟雪糕烘焙茶香突出，配搭啫喱口感層次分明。
 

抹茶脆脆杯 $70

抹茶脆脆杯特別以玻璃器皿裝住，抹茶軟雪糕搭白玉、紅豆同脆脆杯，最啱鐘意食軟雪糕又貪心想要多啲唔同口感層次嘅朋友仔。
 

抹茶提拉米蘇套餐 $108

焙茶提拉米蘇套餐 $108

唔食雪糕嘅抹茶控亦有其他選擇嘅，提拉米蘇套餐可以任揀抹茶或者焙茶口味嘅Tiramisu，再配一杯煎茶、抹茶、焙茶或者咖啡。
 

抹茶大福卷套餐 $98

焙茶黑豆卷套餐 $98

另外仲有卷蛋同芝士蛋糕套餐，同樣包一杯飲品。抹茶大福卷裡面有品牌自家大福，增加口感。焙茶黑豆卷就有獨特嘅烘焙芳香。
 

德島產雞肉生茶麵 $118

日本腐皮生茶麵 $78

呢度亦唔單止得甜品，亦有暖笠笠嘅生茶麵！麵條加入石磨宇治抹茶，湯底就喺鰹魚昆布湯當中加入焙茶。
 

 

熱抹茶牛奶 $50

傳承抹茶——樂只 $55

抹茶專門店當中當然唔少得抹茶飲品啦，入門抹茶控可以試比較容易入口嘅抹茶牛奶，自問已經係超級抹茶控就不妨點高級抹茶，仲可以自己揀親自體驗定由店員代沖㗎。
 

抹茶繪卷 $58

唔得閒坐低慢慢食，亦可以去外賣區揀杯雪糕或者茶嘅。軟雪糕可以加上唔同配料，好似呢杯抹茶繪卷就加咗人氣甜品抹茶繪卷喺上面。
 

（左）焙茶豆乳漂浮 $50，（右）抹茶沙冰 $46

飲品方面一樣以抹茶同焙茶為主，焙茶豆乳略嫌焙茶味道過淡，主要靠軟雪糕帶起茶香。而抹茶沙冰一樣有茶香偏淡嘅問題，上面嘅忌廉同紅豆就一般。
 

（左）小佳女（冷泡煎茶） $28，（右）火男 （冷泡焙茶） $28

而兩樽冷泡茶分別以招牌小佳女深蒸煎茶同淺火焙茶茶葉冷泡一晚，更加能夠突顯茶嘅甘甜味。
 

極上嚴選玉露 $650/支（堂食$98/杯）

呢支玉露認真架勢，唔單止嚟自最出名嘅京都宇治田原，亦特別採用日本抹茶中最高級別嘅茶葉，難怪係2016年日本G7國會會議中用作邀待七國元首。建議用酒杯加冰享用，更加容易飲到茶甘同一陣獨特嘅鮮味。
 

（左）小佳女抺茶生朱古力 $168/70克，（右）火男焙茶生朱古力 $168/70克

（左）小佳女深蒸煎茶 $180/100克，（右）火男淺火焙茶 $68/40克

另有更多茶葉、即沖茶飲及抹茶焙茶烘焙點心等可以買走。抹茶控不妨花啲時間留意下有無心頭好！
 

宇治園
地址：尖沙咀廣東道3-27號海港城港威商場4樓4201-4202K號舖

文、相：Cathy