連續四年獲得東京米芝蓮推介嘅多賀野拉麵正式登陸尖沙咀！多賀野係位於東京一間拉麵小店，由高野先生及其太太兩夫婦小本經營，已經有23年歷史，亦喺日本食評網tabelog曾奪得3.99高分，拉麵專家們一定要嚟試吓佢！

店內裝潢走日式摩登風，有部份枱有趟門隔開，私隱度高。而且亦有唔少打卡位置。

香港店嘅菜單同日本店有八成相似，所有煮法都由日本嘅高野家親自傳授，保證食客食得返日本嘅味道！而且香港店亦秉承日本嘅態度，所有食物都堅持自己造，即叫即製，所以食客要畀啲心理準備要等耐少少啦。

店內有透明玻璃畀食客望住製麵過程，拉麵每日於店內新鮮製作，煙韌、掛湯力強，仔細嘴嚼後會散發出陣陣麥香。負責人話，會嚴格控制住製麵房嘅溫度及濕度，因為每一個因素對麵質嘅影響都好大。

粟國塩味拉麵($128)

自家製清湯底加上栗國產嘅鹽。粟國位於沖繩西北方約60公里，對於日本人嚟講，呢個地方出產嘅鹽係最純正，而且價格比普通海鹽貴六倍。湯底味道清淡，帶有陣陣鹽香。

多賀野醬油拉麵($128)

於清湯底加入豬骨及雞由朝到晚慢火熬煮，再加上自製濃湯。湯底清澈鮮甜，而且一啲都唔油膩，醬油味都恰到好處。

酸辣擔擔麵($138)

鍾意食濃味啲嘅朋友，不妨試吓呢個酸辣擔擔麵。湯底由清湯及酸辣湯組成，加入大量日式香辛料，如胡椒、唐辛子、花山椒及魚介等，嚐辣者必試。

豚鴨沾麵($168)

沾麵亦都係餐廳另一招牌！沾麵汁用上豬、雞、鴨及魚干熬製，味道濃郁之餘有清新感，一啲都唔會漏～

蟹肉薯餅($68)、吉列炸蠔($78)

餐廳另有供應多款小食，炸物嘅粉漿都相當出色吓，鬆脆之外仲夠晒薄。吉列炸蠔好多汁，而蟹肉薯餅蟹肉味都幾重吓。

甜品方面有菠蘿雪葩($68)同椰子雪葩($68)食，食完拉麵後食返個簡直就完美啦！

餐廳連拉麵碗都藏有小心思，當客人飲晒所有湯後，會發現碗底印有「最後一滴最歡喜」嘅日文字。

多賀野  

地址: 尖沙咀梳士巴利道18號K11 MUSEA 2樓220號舖

文: Yanica

相、片: Tom Li