開始數唔到幾耐冇飛過去韓國喇…...不過唔使飛都可以嘆到多款地道嘅韓國美食？！Yesssss！旺角最新開咗間成2700呎嘅韓國食品專門店呀，一站式，由韓國伴菜、凍肉到熟食便當等都齊晒！

呢間專門店，內有3大韓國美食品牌，分別係專賣傳統小菜同腌料嘅BANCHAN、香港首創韓國醬醃肉店Chef & Taste，同埋提供多款熟食便當選擇嘅O'taste，全店有超過200款食品。

首先梗係唔少得好多人都大愛嘅韓式飯捲啦，又方便又好食。師傅每日新鮮製作嘅飯捲，有多款口味，例如芝士紫菜、辣炒豬肉紫菜飯捲等，實淨足料。

望住即場製作嘅豬肉泡菜煎餅，由粉糰到兜下兜下變成香噴噴嘅煎餅，係吸引嘅，微辣開胃。另有多款韓式小食，例如薯仔炸球、甜辣炸雞粒、辣炒年糕等。

正餐又點少得呢？烤牛肉拌飯、烤牛肉一品便當……都係lunch嘅好選擇。

自命係韓粉嘅，係咪好似啲Oppa咁鍾意餐餐泡菜先？呢度提供嘅伴菜、醬菜、腌製食品等有超過50款，包括泡菜、辣蘿蔔粒、辣炒魚仔之類，仲有醬油蟹呢！每日由自家廚房新鮮製作，全部都可以直接食又得，加入火鍋或其他菜食中煮又得。

無論打邊爐定係韓燒，烤肉都不可缺少。呢度有多種燒烤肉類供應，好似韓國直送凍肉、調味醃肉、烤豬手、LA肋骨、牛里脊肉、豬肉餅、烤五花肉，各種韓式火鍋食材同冷凍湯類等等，所有調味同醃製都係由韓籍廚師以正宗韓式醬汁親手醃製。

新店開業，仲有一系列限定優惠，其中又抵又好玩嘅，就有$99韓國零食幸運福袋，一手拎住個箱，一手任執零食，執滿個箱，放到幾多就可以拎走幾多！

一站式韓國食品專門店
地址：旺角洗衣街85號

文、相、片：Kar