日本拉麵唔使多介紹啦，咩係油拌麵（油Soba）？發源自東京，其實係冇湯嘅乾撈麵，通常會加入醬汁、醬油、辣油或者醋等調味料取代湯底，同麵條撈勻嚟食。香港終於出現首間油拌麵專門店牛布拉日式牛肉麵，而且更係東京過江龍添。

牛布拉喺東京新宿及池袋有分店，嚟到香港一口氣連開兩店！第一分店喺馬鞍山，而旺角店就位於新商場內，就腳得多。招牌作牛布拉拌麵同牛布拉蓋飯當然有齊，香港店仲有生薑豚肉、醬烤雞照顧唔食牛人士，亦有更多刺身、沙律、海鮮丼及小食。

做法跟足日本店，選用美國赤身牛肩胛位慢煮，所以每片牛肉仍然帶嫩粉紅色，食落柔軟富肉味。肉量可以揀70g、130g及190g。

麵條就係本地日本人開設麵廠製作，比一般拉麵粗身煙韌，而且帶微曲，可以輕易掛上醬汁。上枱前師傅已經預先撈好，所以每條麵都沾滿醬汁。

三款拌麵有原味、忌廉芥末及辛味，忌廉芥末以牛奶、花奶及芝士醬製成忌廉底，再加鹽醬及香油撈勻，杰身香滑，wasabi味唔濃，食落反而有啲似Carbonara！

忌廉芥末牛布拉拌麵 $118 (130g)

辛味就有辣醬、香油做醬汁，加埋花生碎同埋山椒牛肉碎，味道香辣惹味，個人覺得同牛肉好夾！枱面亦放有山葵醬、炸蒜、日本醋等，加少少令味道層次更多變化。

辛味牛布拉拌麵 $118 (130g)

拌麵仲有個特色食法，食晒所有麵，可以免費追加一口白飯，連汁都撈埋，食得唔好嘥！

另一亮點牛布拉蓋飯，有390g重量級牛肉，層層疊到成坐山咁高，食肉獸一定要試！都係一樣嘅牛肉，加上油醋洋葱汁同埋忌廉沙律汁，酸甜唔會太膩。食唔晒咁大份，可以揀130g ($88)及 190g ($118)牛肉。

牛布拉蓋飯 $198 (390g)

天氣咁熱，唔想食湯麵，油拌麵絕對係好選擇！

牛布拉日式牛肉麵

地址：旺角彌敦道700號T.O.P This is Our Place 4樓406-408號鋪

文、相、片：Perrins