東涌露天熱帶風情餐廳好氣氛好心情驚喜酒香菠蘿批

有時放假都會想去遠啲行下chill下，例如去個東涌都會覺得好似去咗一日半日旅行咁，仲要東涌近海傍嘅位置，開咗間富有熱帶風情嘅餐廳酒吧，兼且有室外座位，有幾張籐椅位最啱打卡，帶埋毛孩一齊去都得。

意式薄切生牛肉片

油甘魚醃魚生

餐廳由摩洛哥籍嘅師傅擔任行政總廚，主力提供多款新鮮海鮮、石窯爐烤焗pizza同乳豬等，前菜尤其出色。特別推介意式薄切生牛肉片同油甘魚醃魚生，前者混入松露沙律醋，勁量嘅36個月熟成巴馬臣芝士片同火箭菜鋪滿喺生牛肉片上，每啖都係牛肉嘅鮮味同鹹香；後者配菜豐富，連埋櫻桃蕃茄、黑蒜、枝豆、炸洋蔥，清新開胃。

Cacciucco 意式海鮮湯

以Cacciucco 意式海鮮湯作為海鮮盛宴嘅開始一定冇錯，湯底以慢煮蕃茄湯同甲殼海鮮湯混合烹調，海鮮足料，有青口、鮮蝦、八爪魚同帶子等，味道當然濃郁鮮甜。

雜錦海鮮塔

兩層嘅雜錦海鮮塔到著，總會引嚟羡慕嘅目光，上層係波士頓龍蝦同松葉蟹蟹腳，下層有新鮮生蠔、熟蝦同青口，兩個人share食啱啱好。

香烤西班牙紅蝦

主菜方面可選香烤西班牙紅蝦，以蒜蓉牛油烤製，蝦肉爽甜、蝦膏又香，仲有陣陣炭烤過嘅香味，同時跟配田園沙律。

意大利式烤乳豬

另外要介紹下石窯爐嘅出品——意大利式烤乳豬。師傅特意選取飼養咗2至3個月、3至4公斤重嘅法國乳豬，加入茴香籽、迷迭香、檸檬皮等多款調味料慢烤約12個鐘後，再用鴨油、橄欖油慢煮，最後放入約330度嘅石窯爐烤焗約4個鐘，好多功夫呢。乳豬皮脆卜卜，肉質依然嫩滑，點埋慢煮小茴香同莎莎青醬，陣陣香草味中和咗乳豬啖啖肉嘅膩感。有兩款size揀，精選份量大約係全份嘅1/8左右，少食多滋味。如果人多要share嘅，當然就揀全份啦，但記住要2日前預訂啊。

菠蘿批配椰子雪糕