日本菜講究不時不食，銅鑼灣呢間新派日式居酒屋就主打「是日廚師精選魚鮮推介」，可以即席挑選從日本漁市場直送到港嘅海產食材，仲可以選擇烹調方式！亦有多款精選單點日式料理及廚師發辦套餐。餐廳樓高兩層，一層係居酒屋另一層係酒吧，可以試勻各式日本清酒同創意Cocktail呀。
 

「是日廚師精選魚鮮推介」（おすすめ）

華鳥風月位於銅鑼灣，25樓係裝修走日本美學「侘寂」風格、清淨而有禪意嘅居酒屋，而23樓就係充滿時尚現代感嘅酒吧。兩層總面積達5,300平方呎。最特別就係能夠喺現場從「是日廚師精選魚鮮推介」（おすすめ）當中揀鍾意嘅海鮮，再由廚藝團隊介紹海鮮特色同建議享用方法，配搭出屬於你嘅心水菜式。
 

（左）伊勢龍蝦刺身，（右）伊勢龍蝦湯（時價）

（左）北海道仙鳳趾刺身配水雲三杯醋，（右）燒北海道仙鳳趾（時價）

新鮮海鮮除咗可以做刺身，品嘗其最原本嘅鮮味之外，亦可以做成唔同熱食，冬天食都唔怕凍吖嘛。例如伊勢龍蝦刺身雪白剔透，肉質彈滑鮮嫩；煮成龍蝦湯嘅時候香味就更突出，啖啖鮮甜。北海道仙鳳趾生蠔肉身肥厚，生食有海鮮鹹鮮，燒過則更顯Creamy。
 

原條燒北海道喜知次（時價）

蒸煮塔斯曼尼亞鮑魚件鮑魚高湯（時價）

喜知次有「海中紅寶石」嘅美譽，唔單止因為魚皮呈深紅色，亦因為係難捕捉嘅深海魚。而鹽燒原條北海道喜知次可以令魚皮香脆，魚肉又保留肥美多汁嘅特色。而塔斯曼尼亞水質清澈潔淨，溫度亦較低，因而當地出產嘅鮑魚亦特別鮮甜厚肉！
 

（左）北海道金目鯛刺身，（右）汁煮北海道金目鯛頭（時價）

（左）北海道八爪魚刺身配芥末漬，（右）燒北海道八爪魚（時價）

燒北海道鱈場蟹腳（$398）

同樣嚟自北海道，金目鯛肉質細膩，八爪魚爽口有彈性，鱈場蟹就夠鮮甜多汁，睇下你鍾意邊款口感而選擇喇。而家用OpenRice網上訂座，指定時段仲有以超優惠價兌換頂級進口時令食材乙款嘅優惠！
 

華鳥風月廚師發辦嚐味菜單（$888/位）

餐廳亦有兩款各具特色嘅廚師發辦套餐，呢款以居酒屋美食為主，唔少都好啱送清酒！包括漬物拼盤、前菜、廚師精選串燒、時令爐端燒、湯品、食事及甜點。例如拍攝呢日嘅精選串燒就有自家製免治雞肉棒、德島縣產阿波尾雞翼、白鱔等。
 

廚師發辦壽司料理菜單（$1,288/位）

想食刺身同壽司，就可以選擇廚師發辦壽司料理，套餐包括沙律、前菜、刺身、壽司、湯品及甜點。圖中就係當中四款壽司：左口魚、大池魚、靖魚、北海道馬糞海膽。
 

 

（上）自家製免治雞肉棒（$48），（左）虎蝦雞皮串（$98），（中）德島縣產阿波尾雞翼（$48），（右）雞頸（$38）

單點菜式種類從串燒、肉食及海鮮料理、前菜小點、佐酒小食、天婦羅到釜飯等應有盡有。串燒仲特別推介虎蝦雞皮串，以雞皮包住虎蝦再燒，燒出雞油香氣之餘亦增加口感層次，中間仲有塊紫蘇葉，平衡油膩感。
 

鹿兒島A4和牛海膽卷（$348）

海膽松葉蟹肉拖羅他他（$288）

鹿兒島A4和牛海膽卷係招牌推介之一，融合A4和牛嘅牛香、海膽嘅甘甜、松葉蟹嘅鮮甜，同魚子醬嘅獨特香氣於一身。而海膽松葉蟹肉拖羅他他賣相精緻，用紫菜包起肥美嘅拖羅同松葉蟹肉一齊食，估唔到又幾夾。
 

香煎甘鯛配栗米蓉（$188）

壺煮北海道活榮螺（$198）

香煎甘鯛別出心裁，魚皮煎焗後連魚鱗都可以食，酥脆香口，而魚肉就非常鮮甜細嫩鮮甜。配搭下面香甜嘅粟米蓉，更可以襯托出甘鯛油脂嘅甘香。活榮螺肥美彈牙，壺煮更可以保留鮮味。
 

23樓為酒吧

Grace（$128）

以茶代酒（$148）

多款創意雞尾酒都好啱打卡，例如Grace以琴酒配搭佛手柑利口酒、玫瑰糖漿同檸檬汁，加上帶玫瑰花香嘅分子泡沫最後以玫瑰花瓣點綴，花香優雅。而以茶代酒就用威士忌、伯爵茶、蘋果汁、檸檬汁調配而成，加上注滿蘋果木煙嘅食用氣泡，一篤穿氣泡馬上有「仙氣」飄出。
 

華鳥風月 
地址：銅鑼灣開平道1號Cubus 23-25樓

文、相：Cathy.H