講起油麻地，文青可能先諗起油麻地戲院或者電影中心，為食友又可能第一時間諗起油麻地果欄或者廟街嗰邊嘅煲仔飯。不過咁，開飯仔介紹得嘅，當然係唔同啲啦，無論你係文青想搵間Cafe Hea下，睇完戲坐低食餐好味西餐，去完果欄掃貨要飲杯咖啡提神，定食完煲仔飯都唔夠接住掃街，開飯仔都有好推介！
文青秘「蜜」私竇 媽不在家
圖：AS777
隱藏喺唐樓樓上嘅一間Cafe，手繪Menu都係一張過列哂所有飲品同蛋糕。最多人點嘅係藍人的秘蜜，係用銀碗裝住藍色花茶，其實係嚟自蝶豆花嘅天然藍色，加咗青檸汁之後仲會變紫色，啱哂拍片呃Like。蛋糕就可以揀紫青仙蛋，即係抹茶Cheese Cake加紫薯蓉，抹茶味道唔會太重所以怕抹茶澀味嘅為食友都可以一試。
轉角遇到英倫風西餐 Plato
講起彌敦道，唔少人嘅第一印象應該係「街邊太多人與車」，呢間餐廳一樣喺彌敦道，不過係轉入去嘅橫巷裡面，旺中帶靜環境先加分。餐廳係簡約英倫風裝修，假日中午可以嚟食個豐富嘅All-day Breakfast，夜晚嚟唔少食家推薦水牛城雞翼、烤德國豬手配酸椰菜同美國極黑豚肉眼扒，分量絕無欺場之餘價錢亦公道。
邪惡炸大腸加牛雜 廟街牛雜
自問係大胃王嘅話，呢個冬天去食煲仔飯之前或之後都不妨嚟呢間小食店，雖然個名就叫牛雜，但其實更多街坊推薦佢地嘅古法炸大腸！原條大腸炸透之後先切件，就咁點甜醬同芥辣就夠令人回味。當然招牌牛雜亦相當出色，牛胃、牛腸、牛心、牛腎等都夠腍，牛腩半肥瘦有肉味，腸亦洗得夠乾淨無怪味。
米芝蓮推介清湯腩 新仙清湯腩咖哩專門店
圖：fumihiko
如果你係一碗牛雜唔夠滿足你嘅牛魔王，咁就要行多幾步，嚟呢間連續四年得到米芝蓮車胎人美食推介嘅呢間清湯腩喇。餐廳有崩沙腩、爽腩同坑腩任君選擇，唔少人都會揀肥瘦適中嘅坑腩，咬落爽滑唔黐牙，帶輕盈滷水香味同時又有肉汁，連蘿蔔都清甜無渣。另外其實佢地嘅咖喱亦唔錯，味道夠香辣惹味。
土耳其「沙上」咖啡 Coffee on the Sand
唔小心嘅話隨時走寶！呢間咖啡店位於一間酒店地下，細細架卡車經過可能都未必會留意到。不過偶然會有唔少人圍住睇熱鬧，皆因呢度賣嘅唔係普通咖啡，而且正宗土耳其咖啡，用熱沙幫咖啡壺加熱，濃郁芳香，冬天飲住杯熱咖啡特別窩心。唔鐘意咖啡嘅話仲有花茶，甚至係土耳其龍鬚糖賣㗎。
三文魚控必到 紅粉佳人
見到個店名就諗起「迷人Pink Lady」？Sorry呀，呢間西餐廳嘅主角其實係三文魚！打開Menu你會見到三文魚嘅各種可能性，例如望落成杯Cappuccino咁嘅其實係泡沫三文魚忌廉湯，燈紅色嘅湯Creamy得嚟又有三文魚香味。主菜方面意式香草茄汁海鮮炒天使麵或者澳洲鮮肉眼扒都唔錯，唔夠食嘅仲可以嗌多個小食拼盤。
一啲都唔悶嘅人情味小店 蘇波榮
圖：Che
雖然餐廳名嚟自英文So Boring嘅諧音，但呢間小店一啲都唔悶，相反其實都幾有趣。一，一個鋪位由蘇波榮、德昌里素食合作社同活化星期日輪流營運，每日Menu都有唔同，可以上佢地Facebook睇。二，呢度係自助形式，人多嘅話麻煩自己搬櫈仔攞餐具，而且連定價都係自由定價，由你去決定你食嘅嘢值幾錢。
有故事嘅正宗咖喱 沙拉姆咖喱屋
香港其實有唔少地方都有正宗咖喱，包括呢間街坊小店，必食嘅係蒜蓉烤餅，軟熟又有蒜香嘅烤餅無論係就咁食定點咖喱都非常好味。至於咖喱咁多種點揀好？呢個時候不妨問下店員意見，佢地對唔同種類嘅咖喱都有相當認識，甚至連背後嘅故仔都可以同你分享埋。連點菜就免費送嘅Papadum都非常薄脆惹味，食得出廚師嘅認真。
開飯編輯推介：
2. 10月份好評餐廳十強
熱門文章推介：
1. 一齊滾起佢！季選任食火鍋
隨時接收最新資訊
讚好OpenRice專頁！
