講起大埔，你可能會諗起唔少掃街同宵夜美食；講起沙田，你可能會諗起三寶同獨有小店，咁火炭呢？其實同觀塘、荔枝角等工業區一樣，喺火炭呢個工業區裡面都暗藏唔少特色餐廳。除咗唔少Foodie都知道嘅伙食工業之外，今次開飯仔再幫大家搵多幾間特色餐廳！

飛甩老土寧靜茶舍　　瑜茶舍

圖：Pigsy、88chan

如果想忙中偷閒一下，除咗咖啡，靜落嚟慢慢嘆杯茶都係個唔錯嘅選擇。呢間茶舍以中國茶做主題，但打開Menu一睇絕對唔老土，例如大紅袍配雪糕，有Affogato一凍一熱嗰種刺激，但入口係大紅袍嘅紅茶香。各款茶點亦相當有板有眼。店主對茶認識頗深，有興趣嘅話可以嚟一場Tea Pairing，一改上茶樓先飲中國茶嘅既定印象。

自己咖啡自己拉花　　笠笠咖啡

圖：hkfoodelicious、lovlovcoffee

唔想坐定定喺度，咁不如一齊嚟學咖啡拉花？放心呢間Cafe有DIY拉花體驗，無論係2D甚至3D拉花都有咖啡師教。最抵讃嘅係唔係得外表，佢地嘅咖啡本身質素都唔錯。唔夠喉嘅話可以嗌埋自製卡通熱香餅，一樣可以畀你自己畫鐘意嘅圖案，保證可以呃Like。另外仲有自製鯛魚燒同各款小食，一班Friend去玩一個下晝都得。

自家水耕溫室種菜　　綠色煮意

圖：wanttoeat

餐廳裝修以簡約Style為主，仲有個種植各款香草嘅露台，望到都覺得非常Relax。以為咁樣已經夠誇張？其實另外仲有個溫室專種水耕菜！想食到食材原味，最好嘅選擇當然係沙律，水耕菜新鮮爽甜，清新開胃。另外大啡菇亦係由本地農場直送，無論係蘑菇湯定係忌廉蘑菇汁牛肝菌意大利蛋麵都充滿獨特菇香。

每日新鮮即製意粉　　Stand Up Pasta

圖：Pigsy、Zoe chui

呢間意粉店喺地鋪，容易搵但空間就相對無樓上舖咁大，可以考慮立食或外賣。佢地主打自家手工闊麵，選用特級意大利麵粉同美國有機雞蛋製造，煙韌彈牙。無飯不歡嘅亦可以一試佢地嘅意大利飯，再加一杯咖啡或者湯，就係滿足嘅Lunch選擇。款式會定期更換，保持新鮮感。

田園風格抵食Cafe　　圓點工房

圖：H0NEYCHIOE、Karying_karen

餐廳有唔少植物裝飾，仲有幅草地牆啱哂各位真文青同偽文青嚟打卡。食物分量十足，加上價錢唔算太貴，CP值相當唔錯。香脆鹹豬手配甜椒汁先起好肉，皮脆口得嚟又夠乾身，豬肉嫩滑而且鹹香惹味。溫泉蛋卡邦尼意粉有半熟溫泉蛋加分，意粉亦係啱啱好嘅Al dente口感。香濃芝士熱狗仲係Double芝士。

Tea time平價All-day Breakfast　　拾悦咖啡

圖：samantha_sum

嚴格嚟講，呢間Cafe唔喺工廈而喺商廈，不過開飯仔知道香港人咁忙，畀多個休閒Cafe選擇大家揀啦。最多人嚟試嘅係佢地嘅All-day Breakfast，因為價錢相當貼地，由最平嘅$39到最貴都只係$88。牛乳滑蛋夠滑而富蛋香，蜜糖雞翼有脆皮夠香口。平價All-day Breakfast限下午3:15-5:15供應，其他時間嚟亦可以一試佢地嘅卡邦尼意粉同小食拼盤。