各位芝士控，有福音要降臨喇！尖沙咀新開咗間主打天然芝士嘅主題café，芝士選擇多，由軟身到硬身都有，坐低慢慢食又得，買走返屋企開party食都得。

呢間係全港首間以天然芝士做主題嘅café，所提供嘅芝士主要嚟自荷蘭、法國同意大利三地。天然芝士牛奶成份佔60%以上，而且冇加任何防腐劑，比起一般芝士更加健康。望住Menu上超過10款嘅天然芝士，就算有埋樣有埋圖都未必識揀。唔緊要，可以叫返個platter逐款試，仲有專人教你點分啲芝士，同埋可以做埋wine pairing添。食一啖芝士，飲一啖紅/白酒，層次仲昇華咗。

 (左)Comte、(右)Morbier

首推嘅一定係得獎芝士，嚟自法國嘅24個月Comte，口感偏向硬身，味道帶有堅果香。細心睇仲可以見到芝士上有粒粒嘅白色小點，原來係蛋白質嚟！有一條條藍色線脈嘅Morbier係以羊奶製成嘅天然芝士，相對上軟身少少，食落有微微羶香。

至於鍾意軟身芝士嘅朋友仔，就可以試下Raclette cheese，呢隻即係平時成日會用嚟整意粉，好易做到熱溶效果嗰隻芝士呀~ 好milky~

當然唔少得重口味嘅代表，嚟自荷蘭嘅blue cheese藍紋芝士啦！就咁食可能會覺得味道較重、或者有啲鹹，但如果輕輕細嚼6啖，再飲多啖紅酒，mix 埋一齊就好鬼正！啲blue cheese喺口中會立即變得滑身咗，仲甜咗添~

另外亦有幾款煙燻芝士，分別有牛奶、山羊奶同香料三款選擇。其中香料嗰款仲帶有微辣添~

餐廳亦會陸續增設多款小食配搭，首先登場嘅就係由法國直送嘅新鮮生蠔，烤焗後配芝士食，味道鮮甜。

BTW，café仲有多款處理芝士嘅器具，好似刨呀刀呀甚至係芝士火鍋煲都有！啱晒各位芝士控，返到屋企都可以嘆芝士。

Café亦會不定期舉辦各類嘅工作坊，好似嚟緊7月25號就會聯乘奧地利高級酒杯品牌Riedel有個wind and cheese pairing 嘅活動，參加者可以一次過試到2款葡萄酒同4款芝士，了解酒杯形狀點樣影響美酒嘅香氣同味道，兼且有2隻紅白酒杯帶走添。報名詳情(按此)

Cheese bb Café
地址：尖沙咀河內道18號K11購物藝術館2樓 K11Natural

文、相、片：Kar