以前只可以去泰國先食到船麵，隨住香港越來越多餐廳供應，甚至開設專門店，留港都可以一嚐泰式風味！觀塘最近有一間船麵專門店，獨沽一味只係做船麵，店主兼大廚專誠去到曼谷學藝，所以味道都好相似。
店主Louis本身唔係廚師，原來因為家人喺泰國做廚，於是決定自己去曼谷學藝，籌備半年，由傳媒人變身食店東主！食物煮法大致上跟足當地，更用上大量泰國食材同香料，好似麵條、醬料等，盡量做到原汁原味。不過某啲食材香港未必有，唯有自己改良。
船麵湯底呈深啡色，用大量豬骨、雞骨、香料及香葉等，熬足6個鐘，每日關店又要開始準備第二日嘅湯。泰國當地會落酸蕎頭水，Louis發現香港的同當地味道差得遠，於是以菠蘿來代替，帶出獨有甜味。而當地亦會加入豬血，呢度就以豬紅，令湯底色水味道更相似。每碗麵亦會加入辣椒醋同辣椒粉，但就唔算好辣。
招牌船長船麵（$48），比當地細細碗份量多，每碗有新鮮豬肉、新鮮豬膶、泰國運來嘅豬肉丸、自家炆製蝴蝶腩四種船麵必有嘅配料，可以揀同樣喺泰國入貨嘅蛋麵同金邊粉。豬膶起沙，蝴蝶腩入味夠腍，湯底冇當地咁濃，味道偏甜，有微微香料味，係幾開胃。
泰國船麵通常配炸豬皮，呢度就配上自家製豬油渣，加埋蒜頭，即刻香口好多。另亦有大量芽菜同通菜，多咗爽脆口感。
呢度仲有唔同配料揀，有肥牛同埋雞。船麵雞（$48）用原隻大雞槌，肉質嫩滑，仲有一隻炆雞翼，非常足料，而且配上船麵湯底都唔會唔夾。
最特別係坊間少見嘅船飯（$49）！Louis話泰國都唔係好多地方見到，但食過覺得幾得意於是推出埋。珍珠米同樣放入湯底浸一浸，之後瀝乾水，令飯粒都有湯底香甜，比船麵更加飽肚。
另外仲有撈麵版 （$48），麵條加入特色ABC醬，源自印尼但泰國人都好鍾意用，味道質感都似老抽，醬油杰身帶甜，撈麵味道有幾分似營多撈麵！唔想飲湯食撈麵就最適合。
小食款式唔多，推介曼谷街頭炸雞翼 （$24），單骨雞翼配泰國炸粉，加埋芝麻一齊炸香，當地人鍾意加泰式辣椒粉，點埋甜酸醬就最惹味喇。
餐廳位於工廈內，但環境乾淨好企理，座位亦闊落。牆上仲有插畫家Angryangry畫嘅作品。不過夜晚7pm就閂，附近返工嘅朋友嚟食lunch就啱晒。
地址: 觀塘成業街19-23號成業工業大廈1樓22室
文、相、片：Perrins