過大海搵食 4間水蟹粥店推介 | OpenRice 香港开饭喇

過澳門咁方便，搭程船一個鐘就到，有時搵個weekend過下去食嘢都唔錯。去親澳門就好似由朝食到晚，一日食成五、六餐咁。冇計啦，樣樣都話必食嘅，葡撻啦、葡國雞啦之類，水蟹粥當然都唔少得啦，lunch廚食又得，宵夜食又得。咁去邊度食最得？介紹4間餐廳過你哋啦。

水佬榮飯店

Photos by donna2004
呢間喺下環嗰邊嘅，啲蟹全部都係即叫即劏，好新鮮。不過變咗就要等耐少少先有得食喇。為咗一煲鮮甜嘅蟹肉粥，都值得等下嘅，雖然話就話係水蟹，但好彩嘅話都會有少少膏食到。

肥仔文美食

Photos by lo bb
生滾水蟹粥直情係呢度嘅招牌菜，一窩有兩隻水蟹，又嫩又甜。啲粥煮得好綿，撈下個底仲會發現有乾瑤柱一齊煮，唔怪得咁甜啦。而主角，即係水蟹亦都好新鮮，有少少膏同時都有少少肉，有驚喜。

六記粥麵

Photos by eatmugfoods
呢度嘅水蟹粥一鍋有兩隻蟹，所以都幾夠味，好鮮甜。大廚用猛火煲嘅關係，煲粥綿綿der好有口感，唔會話好似粥水咁好稀，仲煲到啲蟹汁出晒嚟，融晒入粥度，所以啲粥睇落都有啲淡黃色，食落就更加好有蟹味喇。

牛記咖喱美食

Photos by barrykwok
就咁睇呢間餐廳個名，淨係會以為食咖喱，邊諗度原來佢哋都有蟹粥食，仲要都幾好食。呢度嘅水蟹粥有幾個size揀，碗啦、細窩同大窩，睇你幾多個人些牙啦，細窩都有兩隻水蟹㗎，蟹肉都算多，而且幾滑，而粥底就溝埋蟹嘅味，係甜嘅。

文：Kar

隨時接收最新資訊
讚好OpenRice專頁！