唔少朋友仔去日本都一定會行便利店，睇下有咩平靚正小食甜品。今次終於唔洗「葡萄」日本人啦，因為香港一間便利店獨家引入三款日本甜品，有抹茶控必試甜品杯、醒神最啱嘅咖啡朱古力大福，同北海道忌廉吉士泡芙！
 

宇治抹茶紅豆蕨餅白玉甜品杯（$20）

7-Eleven即日起推出三款日本直送甜品，呢個宇治抹茶紅豆蕨餅白玉甜品杯相信會令唔少抹茶控心心眼！上面有口感煙韌嘅白玉，宇治抹茶忌廉同黑蜜糖心嘅抹茶蕨餅，下面就係抹茶嘅好拍檔北海道十勝紅豆。抹茶忌廉回甘明顯，同紅豆蓉一齊食甜味平衡，蕨餅配黑蜜糖心甜而不膩。
 

香醇咖啡朱古力大福（$12）

唔少「扮工」人士嘅最愛！蕨餅面層係可可粉，裡面係咖啡忌廉同朱古力軟心，蕨餅皮柔軟加上可可粉分量唔少，食嘅時候記得小心啲。裡面嘅咖啡忌廉相當香濃，加上朱古力軟心亦唔會死甜，係比較大人嘅口味。
 

北海道忌廉吉士泡芙（$12）

大大個泡芙裡面係北海道牛奶忌廉同吉士醬，牛奶甜香自然。味道唔算驚喜，不過Tea Time配返杯茶或者咖啡嚟食都係個唔錯嘅選擇呀。
 

7-Eleven指定300間分店有售：https://www.7-eleven.com.hk/assets/0/DessetStoreList_201803.pdf

文、相、片：Cathy