之前開飯仔過澳門掃街發現有麻糬粒粒雞蛋仔，原來而家唔洗過大海，香港一樣有麻糬雞蛋仔呀！呢間小食店之前推出四款新口味雞蛋仔同格仔餅，當中就包括綠茶麻糬雞蛋仔！旺角店仲可以買埋飲品，夠哂方便！
Bove上個月一口氣推出三款新口味雞蛋仔同一款新格仔餅，最令煙韌控心心眼嘅相信都係呢個綠茶麻糬雞蛋仔，每粒日本綠茶雞蛋仔裡面都有粒煙韌麻糬，趁熱搣開仲有牽絲效果啊！
綠茶麻糬雞蛋仔（$28）
不過有讃就有彈，因為麻糬都帶少少甜味，所以就算有綠茶香，雞蛋仔整體都係偏甜。而且雞蛋仔外層唔夠脆，口感層次就爭啲喇。
紫菜肉鬆雞蛋仔（$25）
唔鍾意太甜嘅話仲有紫菜肉鬆雞蛋仔可以揀，肉鬆落得夠爽手，粒粒雞蛋仔都咬到，一脆一鬆一甜一鹹，呢個配搭都幾特別，而紫菜就進一步增加香味。
阿華田脆脆朱古力格仔餅（$30）
格仔餅新口味就係阿華田！其實即係原味格仔餅再加黑朱古力醬同阿華田脆脆，食落又無想象中咁甜，平衡得唔錯。
格仔餅本身都幾香脆，加埋阿華田脆脆就好似以前食加咗砂糖嘅格仔餅咁，有啲沙沙地嘅口感。
更多【飲食潮流】： |
土豹（黑糖珍珠港式奶茶）（$26/500cc）
旺角店隔離就係姐妹品牌豹茶，主打有香港特色嘅茶飲，好似呢杯土豹其實就係最近大熱嘅黑糖珍珠加港式奶茶！有黑糖紋掛杯，影完相就記得搖勻先好飲。自家熬製嘅黑糖珍珠食落比坊間台灣過江龍無咁甜，口感偏煙韌，比較貼合一般港人口味，不過開飯仔今次就食到部分珍珠唔夠入味啦。而奶茶底都唔錯，口感幾滑又夠奶茶香。
紅柚凍頂（$28/700cc）
同時亦有水果茶供應，例如呢杯紅柚凍頂，凍頂烏龍茶香嘅回甘同柚子嘅微澀夾埋相當清新。見到紅柚片之餘，飲落亦有粒粒柚子果肉！怕甜嘅朋友可以揀少甜，更容易飲到水果清香。
Bove
旺角花園街174A號地舖
葵芳葵涌廣場3樓Top世界3069-T20號舖
九龍灣牛頭角道77號淘大商場地下G128號舖
元朗又新街38號恆富大廈地下15號舖
文、相、片：Cathy