有聞黃大仙有求必應，唔知係咪連住喺黃大仙市民嘅願望都有聽到，所以區裡面都有唔少平民得嚟又好味嘅食肆。由心機家庭式中菜館到正宗潮洲打冷，新派心思甜品到老字號擔擔麵，甚至24小時都可以開餐嘅冬菇亭都有。連黯然銷魂飯都介紹埋畀你，要搵食神有幾難？
抵食心機菜館 南味小調 原創風味篇
呢間小館係家庭式經營，菜式全部食得出心機，例如香辣麻雞煲唔單止調味得宜又入味，仲特別加蝦入去增加鮮味，麻、辣、鮮有齊。想再滋補啲仲有米酒雞花膠鍋。如果係Lunch time去就推介佢地嘅招牌肉燥飯，雖然賣相唔算非常吸引，但食落肉燥鬆身入味，的確有地道台灣風味。加埋碗真材實料無味精例湯，好似返咗屋企開飯咁。
街坊推介黯然銷魂飯 英都燒味廚房
圖：時桃、DearSueSue
雖然睇落就好似普通茶餐廳，但聽聞叉燒嚟講，黃大仙區佢認第二無人咁認第一。叉燒鬆化得嚟又香口，肥瘦比例適中而肉味濃郁。嚟碟黯然銷魂飯，燶邊半生熟荷包蛋，撈埋叉燒同豉油無得輸。黯然銷魂飯唔啱嘅話仲有滑溜香口嘅叉燒炒滑蛋飯，或者香噴噴嘅葱油叉燒撈公仔麵。下午茶可以點新鮮叉燒番茄豬仔包，夾埋生菜、番茄同醃青瓜更清新！
花心思心太軟+紫薯甜品 想甜嚐甜
以為舊區就無特色甜品店？咁你就大錯特錯啦，呢間小店以特色心太軟發圍，唔單止有少女最愛嘅玫瑰荔枝、大熱抹茶、重口味榴槤等應有盡有，而且流心效果唔錯，配酸酸地嘅乳酪雪糕完全唔Heavy。另外紫薯甜品係另一推介，紫薯奶凍放喺菂式煲仔裡面，打開蓋見到滿滿嘅紫薯粒立刻變心心眼，配埋少少甜嘅滑溜奶凍，味道平衡。
辣得「喜」川菜老店 詠藜園四川菜館
招牌擔擔麵湯底濃香味美，麵條彈牙有咬口。食肉獸可以加錢轉改良版，更多肉碎撈住食更滋味；無辣不歡嘅記得叫麻辣擔擔麵，啖啖麻辣過癮。中場休息食碟皮蛋豆腐，雖然豆腐係來貨但勝在滑溜無比，配埋流心皮蛋同甜甜地嘅醬汁，醒神返哂。另外水煮牛肉、口水雞同涼拌雞絲拉皮都有唔少人推介。最後叫翻碟豌豆黃做甜品，滿足哂。
隱世風味串燒 原燒
呢間小店位置比較偏僻，有食家話如果佢唔係黃大仙街坊真係好可能搵唔到！不過換個角度睇，咁咪可以成為約埋知己朋友放心一邊飲啤酒食串燒一邊吹水嘅好地方囉。串燒由牛、雞、豬肉到海鮮都應有盡有，烤法亦有唔同，有簡單鹽燒，或者加照燒汁嘅日式等。當中比較特別嘅有厚燒玉子、燒午餐肉同燒菜心苗。
街坊正宗潮洲打冷 雄興美食
圖：小GRA
宵夜除咗串燒，仲有潮洲打冷呢個好選擇。煎家鄉蠔餅炸得金黃香脆不在話下，蠔仔落得爽手而且又大隻。名師蠔仔粥嘅蠔仔一樣大粒肥美，配大地魚粥底相當鮮甜。秘製鹵水鵝肉質嫩滑又入味，不過溫馨提示一句，另一招牌馳名鹽焗雞雖然肉質一樣嫩滑，不過有部分食家覺得過鹹，建議唔鐘意重口味嘅吃貨考慮清楚先叫啦。
廿四小時無休冬菇亭 醉和里
如果話正宗潮洲小店已經唔多，咁舊式冬菇亭更加係買少見少，呢間仲要係二十四小時無休營業，幾點都歡迎嚟開餐。凌晨開始有各種點心，午市開始做炒粉麵飯同港式常餐，晚市就提供廣式小炒同潮式打冷。特別推介晚市小菜，無論係外脆內軟嘅邪惡酥炸大腸，定係金黃惹味嘅南乳炸雞件，都啱哂放工送啤酒。
隨時接收最新資訊
讚好OpenRice專頁！