新一年想Sweet啲，由朱古力同芝士甜品開始！沙田區呢間酒店餐廳推出以朱古力同芝士做主題嘅甜品下午茶自助餐，迷你朱古力火鍋、原粒士多啤梨焗芝士撻、即製朱古力梳乎厘班戟、朱古力脆皮紐約芝士蛋糕等全部都係任食！
 

2+2 café即日起逢星期一至五供應朱古力「芝」味甜品自助餐，當中最特別嘅係每兩位可享一份迷你朱古力火鍋，裡面係用62%朱古力同忌廉煮成嘅香滑朱古力漿，無論配雪糕、窩夫、雜果粒定棉花糖都咁夾。另外即製朱古力梳乎厘班戟亦係必試，選用72%特濃朱古力，入口即溶之餘更多一份可可甜香。
 

而芝士主題甜品亦非常吸引，士多啤梨焗芝士撻就有牛油曲奇撻皮配滑溜芝士軟心，上面再舖滿原粒士多啤梨同以點點金箔點綴，賣相同味道同樣誘人。熱情果芝士凍餅就用熱情果嘅酸甜搭配幼滑芝士凍餅，感覺清新。
 

自助餐甜品選擇仲包括朱古力泡芙、朱古力脆皮紐約芝士蛋糕、即製Oreo朱古力窩夫、朱古力咖啡歌劇蛋糕同蜂蜜日式芝士蛋糕等。啱就約埋你身邊嘅甜魔們一齊嘆個滿足下午茶啦！

2+2 café 朱古力「芝」味甜品自助餐
供應日期︰即日起至另行通知為止逢星期一至五（公眾假期除外）
供應時間：15:15 - 17:00
價錢：$118/位（另收加一服務費）

文：Cathy