肉餅飯係好普通嘅家庭菜式，由細食到大～但愈普通愈簡單嘅菜式先愈考功夫，近年都有唔少主打肉餅飯嘅餐廳冒起，以香煎居多，而且仲衍生出唔同口味添。

目錄

即叫即煎蝦頭油肉餅飯 金飯館貳‧零 肉餅‧焗飯專門店

肉餅飯最重要就係新鮮熱辣！呢間新開嘅肉餅飯專門店主打即叫即煎生煎肉餅飯，肉餅用新鮮嘅豬後腿肉同腩肉攪碎製成，比例恰到好處，然後以煎焗形式烹調，肉汁滿滿。口味都好多變，無論你係傳統定創新派都好多選擇。特別推介蝦頭油肉餅飯，加入自家秘製蝦頭油同新鮮蝦肉，令肉餅充滿濃郁嘅蝦油香氣，面層加埋酥脆惹味嘅櫻花蝦，口感又豐富咗。黑松露墨魚肉餅飯以墨魚配上翠玉瓜製成，爽口彈牙更帶有濃郁黑松露香氣。

大圍人氣生煎肉餅 金城茶餐廳

圖: loklucas

被稱為大圍名物嘅生煎肉餅飯，店舖細細坐就坐得迫啲，但仍然無損大家對肉餅飯嘅熱情～招牌生煎肉餅飯煎到啱啱好，香脆又上色，厚身啖啖肉，肉餅本身好重肉感，唔會好多肥豬肉，咬落juicy有肉汁，加埋馬蹄粒增添甜味同口感，連埋豉油同辣菜脯一齊撈飯，好爽呀！

焦香肉餅配自家製XO醬 公子茶座

圖: lamlamlei612

呢間一樣主打生煎肉餅飯，呢個生煎肉餅好厚好大件，食落外層香脆，嫩滑多汁，唔會太肥膩。面頭仲加咗店舖自家製嘅XO醬同蔥油豉油，香辣惹味嘅同時又帶少少甜味，飯底軟硬度適中，粒粒分明，真係必叫之選。

超創意肉餅專門店 屏山老地方

圖: foodiewing

想食唔同口味嘅創意肉餅，呢間就啱晒，淨係肉餅飯嘅選擇都有五十幾款！首推六重芝士肉餅飯，成個飯嘅份量都好多，肉餅上鋪上滿滿芝士，然後兩塊肉餅中間都夾滿拉絲芝士，芝士控一定要嚟試。想味道更有層次，不妨試下松露芝士牛肝菌煎肉餅飯。另外芒果煎肉餅飯都令人驚喜，芒果同肉餅嘅味道比想像中夾，仲可以減低膩感添。

香濃蔥油肉餅飯 祥勝茶餐廳

圖: johnny-why

大坑地道舊式茶餐廳，必食係呢個蔥油煎肉餅飯！佢絕對唔係普通嘅蔥油飯，肉餅上鋪滿咗用滾油爆香嘅蔥同洋蔥，十分之香～煎肉餅同樣外脆內嫩，好有鑊氣，配埋甜豉油撈飯，係舊香港嘅味道啊。

文: Yanica