近年歐美吹起Super Food熱潮，牛油果都係其中之一。雖然牛油果熱量比起唔少生果高，但其實牛油果嘅不飽和脂肪係屬於「好」脂肪，可以幫助降低壞膽固醇同血脂。而且有豐富豐富鉀質同纖維。平時買返嚟剩係識整果醬搽多士？不如去呢幾間餐廳試下佢地嘅牛油果菜式，一邊醫肚一邊偷師。
鳥語 牛油果蟹棒帶子刺身溫泉蛋飯
尖沙咀文青Feel Cafe，Menu上面有唔少牛油果菜式，比較多食家推介嘅就係呢個牛油果蟹棒帶子刺身溫泉蛋飯，軟腍香滑嘅牛油果肉同新鮮嘅帶子蟹棒夾得嚟又清新，撈埋溫泉蛋汁同沙律菜最啱做Light Meal！
KS Cafe 牛油果海蝦釀燒烤菇
圖：胃食小王子
唔少人食西餐都會叫碟烤菇做前菜，其實Juicy烤菇同Creamy牛油果都好夾，例如天后呢間西餐廳就用一塊塊牛油果加埋彈牙大蝦釀落啡菇度，上面加埋少少芝士再烤，賣相相當誘人，而且香口得嚟又健康。
Vision 8 卡邦尼牛油果醬意大利粉
圖：小慳妹吃好西
荃灣呢間西餐廳就將牛油果嘅軟腍特色發揮得淋漓盡致，因為佢地將熟牛油果肉打成蓉，混入卡邦尼汁整意粉！食落少咗一份膩口多咗一份牛油果嘅香味，而且更Creamy更掛汁，加埋煙肉同雜菌估唔到咁夾。
悠蔬食 香芒牛油果苜蓿芽手卷
如果想再健康啲嘅，不妨嚟銅鑼灣呢間新派Fusion素菜店。呢個香芒牛油果苜蓿芽手卷係唔少食客嘅開胃前菜首選，酸甜多汁嘅芒果同清香苜蓿芽，配埋牛油果一齊食特別清新。記得趁紫菜未淋之前食！
一門 東洋卷
平時食日本菜都係得牛油果軟殼蟹卷，銅鑼灣呢間日本料理館就有個相當創新又配搭得宜嘅東洋卷，用薄Pancake皮包住飛魚子、牛油果同鰻魚，飛魚子嘅鹹鮮、牛油果嘅Creamy同鰻魚嘅魚脂香相輔相成。
Rosie's Cafe by cafe company 煙三文魚牛油果班㦸
沙田呢間和風西餐廳其中一個招牌菜就係呢個煙三文魚牛油果班㦸，同迷你煎Pan辣辣送上枱，微暖嘅牛油果更加入口即溶，同三文魚嘅脂香同Pancake嘅蛋香又夾到。
SHARI SHARI Kakigori House 氷屋 牛油果煉奶刨冰
圖：au9
用牛油果做甜品一樣得！銅鑼灣呢間日式刨冰店就有個令唔少甜品控都一食再食嘅牛油果刨冰。大大份刨冰上面淋上淺綠色厚身嘅牛油果醬，刨冰裡面有一層煉奶同消化餅碎，所以食落味道清新又香甜。
第一郡 牛油果沙冰
圖：au9
最後介紹埋飲品！深水埗呢間家庭式越南菜館就有唔少食家大讚真材實料嘅牛油果沙冰，飲落無細冰粒，口感幼滑豐厚到好似奶昔咁。而且牛油果味道亦濃郁，各位牛油果Fans懶得自己打嘅話嚟呢度就必試。
開飯編輯推介：
2. 10月份好評餐廳十強
熱門文章推介：
1. 一齊滾起佢！季選任食火鍋
隨時接收最新資訊
讚好OpenRice專頁！