打小人淨係可以去鵝頸橋？咁又未必，因為而家餐廳都有打小人服務，聽落又真係幾有趣喎。無錯！荔枝角呢間以打小人作主題嘅東南亞菜餐廳由Super Girls嘅Yanny同佢拍擋Kenny開設，佢哋話開呢間餐廳係因為覺得香港人生活壓力好大，希望可以畀一個平台大家發洩，分享喜怒哀樂。每逢星期六都會有一位嚟自鵝頸橋嘅姐姐幫手喺餐廳打小人，同埋仲有張小紙仔畀大家寫低想寫嘅嘢，寫得好仲有得貼堂添～
至於點解選擇賣東南亞菜，佢哋就話留意到香港人好鍾意亞熱帶國家，放假去旅行時都常去泰國呢啲陽光與海灘嘅地方，所以無論裝潢定食物，都希望可以營造到度假嘅感覺。
海南雞飯特意選用走地20天嘅粟米雞，而且雞有用上湯浸過，嫩滑之餘有一層啫喱，口感寧舍特別。講到海南雞飯，個油飯一樣咁重要，油飯添加咗造雞過程中嘅雞汁，油份較少，粒粒分明，食落去特別香～
更多【名人店直擊】： |
咖喱喇沙用咖喱同多款香料熬製出一個濃郁嘅湯底，而且海鮮料都好足！
檳城炒粿條嘅粿條係由怡保空運到港，相對於香港嘅河粉口感特別煙韌。
炒咸牛肉厚蛋吐司，吐司選用丹麥麵包，會特別重牛油味。蛋煎得好厚身，咸牛肉由廚師自己調味，一啖食落去真係好滿足！
除咗主菜外，亦有多款小食如粉紅醬通菜及脆卜卜春卷供應。
另外佢哋都對餐廳供應嘅咖啡好有自信，因為特意從台灣邀請了一位特別擅長調製咖啡嘅咖啡兵嚟，平時鍾意飲咖啡嘅朋友要去試吓！
地址: 荔枝角青山道495號誠信中心地下1號舖
文: Yanica
相、片: Tom Li