蒲羅

营业中

休息中

今日去了樂富行街，見到有間馬拉菜餐廳，門口都幾多人等，估計應該ok,於是攞飛試吓。入到去見到餐牌價錢都大眾化，點了個半熟蛋配咖吔多士、烤馬來蔥餅配咖喱、檳城蝦麵、娘惹茶薰鴨喇沙摻摻、海鹽雪糕椰汁珍多冰同馬來芒果汁配芒果雪糕。先講個咖吔多士，上枱時啲多士已經凍晒，唔熱，味道食落去普通，反而個半熟蛋幾特別，係要撈埋甜豉油一齊食。然後到個馬來蔥餅，同一般蔥油餅差唔多，但係唔知係咪今晚好忙，上枱時都已經係凍。接住講個喇沙摻摻同蝦麵，份量都幾大，一碗夠兩個人食。兩款嘅湯底都唔錯，特別係個蝦麵，湯底夠濃味，而且當中係有啲似粉絲嘅(應該係摻摻)配埋油麵，食落去一粗一幼，個口感幾特別。而兩款嘅餸都好多，碗喇沙摻摻啲茶薰鴨有成7、8塊，而且每塊都大件，食落去唔韌，味道亦都ok。至於兩杯飲品方面，海鹽雪糕椰汁珍多冰，以為同平時飲開嗰啲珍多冰上面加件海鹽雪糕，但飲落去似係汽水上加件雪糕。而杯芒果汁配雪糕，飲落去尚算一般，無咩特別。總括嚟講，今次上嘅菜色正常，鍾意濃味嘅應該會鍾意，而且份量夠大，啱大胃口嘅朋友。