一哥點心 (已結業)

一直都呢聞呢間一哥點心唔錯🙇🏻‍♂，一直都未有時間特登入元朗。早排終於去食，果真冇令我失望～-紫薯流心煎堆仔 $28依個點心真係超好食！外皮係一層酥脆既紫薯皮，中間係軟冧冧既紫薯蓉再包住最入面既流心奶皇餡，非常出色同特別。一啖咬落去流曬啲奶皇餡出黎👍🏻，算係必叫既一味點心。-千島醬脆皮蘿蔔糕 $28就咁睇圖都唔知係蘿蔔糕黎😂，炸粉落得唔算多，所以個外皮都唔會太厚。出面炸得脆卜卜，而入面既蘿蔔糕軟冧冧，口感都幾特別。表頭有少少木魚花，加埋千島醬一齊食，十足十食緊章魚小丸子咁，我就覺得幾特別、幾好食。-韭黃鮮蝦腸 $28啲蝦又大隻，腸粉皮又幾薄幾滑，係份量較少。-原隻大蝦燒賣 $28蝦大大粒，豬肉餡都夠飽滿、皮薄，整體黎講味道唔錯。-蒜香炸春卷 $24春卷炸得幾脆，放左一陣先食都唔會太冧👍🏻。仲有啖啖蒜香味，岩曬鐘意食蒜同煎炸野既朋友。-依間既點心多數都比較新派特別，味道亦都唔錯，雖然地點對住係九龍港島既比較偏僻，但都係一間值得一試既點心鋪😋。

原隻大蝦燒賣啲蝦都幾大隻，同埋陣蝦味都幾吸引，每次來到都喺必叫嘅嘢。今次食呢個蜜汁叉燒腸有啲失望，叉燒味唔喺好夠，叉燒又有啲乾，幸好腸粉都滑，同埋食落唔覺好甜。原籠章魚肉餅飯啲章魚味幾濃，可以遮晒我唔中意嘅豬肉味，食到肥豬肉嘅次數喺零，呢點我覺得非常正，成盅飯用荷葉包住蒸，啲飯吸收咗啲荷葉味，再加上啲飯嘅黏度，真喺好似食緊糯米飯，超級好味。來過幾次我都無叫過彩虹椰汁糕，今次就特登來試下，啲椰汁味都夠嘅，椰汁糕上面仲有一層略帶酸味嘅jelly，有啲似雜果賓治啲味。

下午2點幾, 未食晏, 一家4口,途經元朗, 見新開張一哥點心, 入去試試, 前面約有4-5 人, 等了約10分鐘,算快.入面裝修光猛, 環境清潔, 冷氣適中.點了春風得意腸, 腸粉皮夠薄且滑.大蝦燒賣即叫即蒸, 因出面的通常大而無味, 所以以為一樣, 竟然蝦大而有蝦味!小朋友想食馬友肉餅飯, 本來只想試一"盅", 驚食唔晒, 點知自己劃錯"籠", 錯有錯著下, 又俾我哋食晒!(平時兩個小朋友唔係食好多)隔離枱夫婦有叫呢樣, 都話米飯最呃唔到小朋友, 如果唔好食, 佢唔會食得多.最出色的, 本人認為, 莫過於日式翡翠豆腐, 淡綠色的豆腐, 嫩滑又清新!老公最喜歡甜品, 當然點了紫薯流沙煎堆仔, 熱騰騰的, 一流!唯一美中不足的是,可能因為新閧張, 嗰個招牌黑豚肉脆脆猪, 竟然賣晒!仲有, 見隔離枱想影張相介紹俾朋友, 但係張點心紙無地址同電話, 要再問老闆攞咭片先有. 如果印喺點心紙會方便D.以上都係小問題, 希望佢慢慢改善就Perfect!!!最重要係價錢相宜, 2 大人2小童, 埋單2百幾!以後去到元朗又一打蠆處!