金記客棧 (已結業)

數碼港位處港島一隅，一向是港島人嘅後花園，泊車去商場然後去戲院睇戲，出外面行陣公園，咁就可以消磨大半日。不過數碼港一向問題就係缺乏比較似樣，價錢又合理嘅餐廳，因此睇戲之外食嘢就要走返出去。今日又係過去睇戲，見酒樓旁邊開咗「金記客棧」，於是睇完戲，食埋飯先走。呢間嘢特別在有燒味供應，於是例牌叫叉燒切雞嚟食。叉燒肥瘦適中又夠滑，仲有小燭台響下面暖碟，吹多陣水都無怕啲叉燒凍咗，幾好。有兩份肉當然要整返份菜，蒜蓉西蘭花呢類簡單得嚟可以好大鑊嘅菜就最好。嚟到見到炒得幾靚，食落又唔覺好多油，唔錯。素食成為潮流，好多餐廳為照顧素食人士都推出咗素食碟頭飯，呢度都唔例外。上面食咁多肉，叫埋呢個碟頭飯，有番茄煮蛋有白飯，拎嚟送飯送菜送肉更開胃。整體而言，金記進駐數碼港係好事嚟，最少去數碼港睇戲後，唔需要走返出去食嘢，亦唔需要局食牡丹樓。

話說阿P上次終於帶咗阿J 去金記得冰室食第一次的冰室飯後，今日我們又去金記，不過今次唔係去冰室，而係去在數碼港開張無耐嘅金記客棧。這間客棧的裝修簡潔開揚，部分裝飾上與冰室的互相呼應，都是以香港特色作主題。睇到店內有一個燒味專櫃，所以決定試下它們的叉燒($88)同燒鴨($88)。叉燒入味鬆軟，燒鴨亦皮香肉嫰，再叫個上湯瀨粉一齊食，正。這裡的燒味師傅有d 料到，唔錯。友人話今餐想食香口d的小菜，當然冇問題。先來椒鹽一口豆腐($78)。粒粒豆腐夠乾身，炸得香脆香口，椒鹽味亦不會太搶太鹹。嚟多個椒鹽系列海中蝦($168)。香口的椒鹽佈滿在爽口的蝦身上，我食了3大隻。芝麻黑糖醋骨($88)。酸甜的黑糖醋配以香口芝麻，惹味得來又醒胃，排骨入味香甜。我又鍾意食蛋，又鍾意食韭王，又鍾意食蝦仁，滑蛋韭王炒蝦仁($88)這道菜，Bingo哂。蛋炒得夠嫩滑，蝦仁爽口彈牙，唔錯。以往PJ帶小松松來數碼港通常都係食2樓嗰間西餐，因為貪有露天位置可與小松松一起進食，而金記客棧亦醒目地設有幾張戶外座位，以後數碼港友與PJ 同小松松一樣又多一個開餐地㸃喇。

去數碼港看看電影，當然在那裡食午餐最方便，想起早前的金記都唔錯，就選擇這間吧。因趕著食完飯看電影，看完餐牌後，決定叫燒味飯最快，所以叫了杏仁霜、蜜汁叉燒、燒鴨、蒜茸炒菜心及上湯瀬粉。杏仁霜 ～ 味道濃郁，杏仁味香甜，好有當年在台灣飲過杏仁霜的感覺。蜜汁叉燒 ～ 叉燒上枱時，奇怪怎麼隻碟這麼高呢？原來底層放了一個小小的蠟燭，用來保溫，實在只非常細心的設計。最喜愛半肥瘦叉燒，不會太乾身，帶有油香味，更能增加口感及食欲。燒鴨 ～ 雖然唔及燒鵝的香，但肉質鮮嫩，如皮可以再脆一點就更好了。蒜茸炒菜心 ～ 中國人，有肉當然要食番一碟菜來平衡一下，蒜茸炒得好香，菜也新鮮有咬口。上湯瀬粉 ～ 天氣太熱，總是喜歡食些比較濕潤的瀬粉，當前不二之選。上菜速度超快，食飽飽還可以休息一下才起行，休休閒閒看戲去。