平民扒房@友蠔食 (已搬遷) 新店位置

連假幾天，咁梗係要岀去搵食，去到旺角通菜街見到兩邊都好多食肆，不過我地就已經有目標，去食生蠔同据扒🤩鋪面細細，人手唔多，本身打算叫個二人餐，已包括海鮮拼盤同石燒和意粉，不過後來見到生蠔拼盤好吸引，而且適逢餐廳周年大酬賓，所以就轉左為散叫。1️⃣ 生蠔拼盤🦪 $198+$60共12隻，本身$198有12隻普通No.3生蠔，但可加$60將其中6隻升級為No.2法國頂級生蠔，普通生蠔都好爽甜，而法國生蠔十分新鮮，海水味濃😋2️⃣ 蒜蓉焗珍寶生蠔 $78優惠其間，做緊$78兩隻，有大半隻手掌咁大，加上蒜蓉同香草，即叫即焗，肉質嫩滑。3️⃣ 石燒巴西牛柳🐂 200g $88餐廳分開冷熱兩塊石板，上枱時只有1成熟，等客人可於熱板燒好後，可放回冷板上待食，唔會令到牛肉過熟，牛柳上有一堆蒜蓉，配有少量蔬菜，另附上黑椒汁或洋蔥汁，牛柳非常淋滑，食落有牛味。4️⃣ 蒜蓉白汁蜆意粉 $88大約有7-8隻大蜆，食落仲有啲海水味，意粉用牛油炒過，好香，而且煮得剛剛好，唔會太淋，推介👍🏻5️⃣ 紅白酒 $48優惠其間，紅白酒買一送一，只係$24一杯，不過質素就真係好麻麻😒

旺角通菜街又稱女人街，以前就以排檔見稱，但近年躲藏喺排檔之後嘅餐廳都好多選擇，而且都不乏捧場客，有唔少都要排隊等位，今日就選擇咗平民扒房@友蠔食。呢度其中一款招牌菜式就係熱石板牛扒餐。另外一款主打就係生蠔，而且仲做緊優惠。熱石板餐包含咗蕃茄湯，味道又香又濃。嚟呢度當然要食生蠔，淺嘗價6隻生蠔只需$128，呢個價錢真係必食。頂級法國生蠔海水味較濃，生蠔亦夠creamy。西班牙珍寶生蠔就以size取勝，味道亦不錯。巴西牛柳400g估唔到係咁大堆頭，滿滿咁舖喺熱石之上，店員仲會好細心講解如何自行烹調牛扒，要生啲熟啲完全由自己控制。蔬菜有西蘭花、甘筍仔、粟米、車厘茄，下面仲有好好味嘅薯蓉。另外仲揀咗蒜蓉白汁蜆意粉，意粉嘅白汁唔算好濃，更能襯托出蒜香，加埋洋蔥同香草，整個意粉味道更加豐富。蜆肉總共有七隻，而且粒粒飽滿。雜莓特飲同埋芒果乳酸特飲只係加$12，絕對抵飲。食埋生蠔埋單都只不過係$220一位，價錢真係夠晒親民！

燴龍蝦忌廉意粉 🍝 $99 (8/10)睇落就細細碟 其實分量超多 意粉嘅軟硬度適中而且幾掛汁 忌廉醬幾creamy 但係同時又唔會太過漏 龍蝦有兩丈舊 仲有蝦膏 真係好足料 龍蝦肉質比較紮實 彈牙有口感巴西牛柳(200g) 🥩 $88 (7.510)200g就大概係一隻手嘅份量 厚度都有兩至三cm 一上枱店員都好詳細咁解釋點樣煎塊牛扒首先要係熱石度煎熟 再放喺凍石到放涼 避免過熟 一開始都有少少手忙腳亂 但係都幾有趣 因為係自己煎 所以熟度可以自行調整 另外會配黑椒汁或者洋蔥汁 亦都可以跟飯意粉或者薯條 今次就揀咗薯條 份量超級多雜莓乳酸特飲 🍓 +$8芒果乳酸特飲 🥭 +$8平時都比較驚呢啲特飲會好伏 但係今次都唔錯乳酸味幾重 甜度適中 OVERALL:推薦😆 (7.5/10)叫得平民扒房就知價錢夠晒親民 大概$50最平就食到個餐 仲包是日例湯 性價比幾高 而且小店亦都主推生蠔 不過當日因為生蠔師傅唔喺度就試唔到啦 價錢同樣都幾親民 小店位置唔多 夜晚更加係會大排長龍 不過因為小店冇得book位 大家可以選擇外賣自取或者早啲嚟食

小店環境較細小，座位不多，需要拎籌等位～另收加一服務費是日推介生蠔 $198 @12隻，頂級法國生蠔🦪$198@6隻，size 是No.2左右。本來這個價錢沒有太大期望，點知上枱時有驚喜，它的大細媲美平時網上買的，好抵食，入口時有淡淡的海水味～新鮮#澳洲和牛 $148@200g 充滿油脂的厚切邪惡和牛，石燒時彈油射程遠（記得用紙巾擋著）肉質嫩滑而且夠腍，沾醬後帶出香甜和牛味。吃多會膩，旁邊有些蔬菜🥬薯蓉解濟。推介～#石燒牛柳 #巴西牛柳 $88@200g配合一冷一熱石頭自行加熱，生熟程度可配合自己口味調整，不錯的設計～牛柳也是非常厚切，肉質偏瘦，不怕肥。#菠蘿特飲 $18不會太甜的菠蘿味梳打，好飲～個人喜歡💕#野梅乳酸特飲 $22不會很酸，甜甜的開胃#是日餐湯充滿蘑菇碎的蒜蓉湯服務質素：7/10環境舒適度：6/10ᶘ ᵒᴥᵒᶅ個人口味評分：8/10

這間餐廳位於旺角，有得食生蠔🦪，又有得食石燒牛扒🥩，而價錢相當親民。 🦪愛爾蘭生蠔 $168/半打 🥣蕃茄湯 x2 🥩美國牛板鍵 $98/200g 🥩巴西牛柳 $88/200g 🍝蒜蓉白汁蜆意粉 $88 🥛青蘋果特飲 $22 🥛芒果特飲 $22 我哋先食咗生蠔，少少腥但都幾肥美幾好食😋。蕃茄湯就好濃郁，番茄味好突出。我幾鍾意意粉，啲白汁煮得幾creamy🤤，恰到好處，食上去口感好好。至於兩個牛都好大塊，啲肉好厚身，我哋自己切到一粒粒嚟食唔會覺得韌，燒到大概八成左右🔥，啖啖都係肉，感覺好正，我幾鍾意佢嘅黑椒汁。芒果特飲酸酸地，青蘋果加咗乳酸，酸中帶甜都唔錯👍。 鋪面比較細但食客都幾多，所以幾狹窄。用嘅料雖然未去到好貴價，但係味道係唔差，呢個價錢食到咁豐富，性價比絕對高🤩。 📍平民扒房@友蠔食 - 旺角威達商業大廈地下D號舖

同事唔知發咩神經話要去食蠔...然後就黎左平民扒房啦~一黎就價錢都唔睇就叫老細要半打生蠔...明明今日好凍...老細一拎上枱,我地都"哇"左一聲, 美國生蠔真係好肥好飽滿, 3個人每人2隻真係唔夠喉, 不過過下口癮真係好唔錯~美國蠔都幾有海水味, 食落口仲可以嚼多兩啖, 因為真係幾飽滿, 而且食得出新鮮,新鮮的蠔真係唔吱檸檬唔點醬都食得出鮮~老細真係幾細心, 估我地都係三個人share架啦~我地都未出聲,就已經俾左三隻碟我地再黎就係"蒜香海膽香草意粉", 同事一黎就食晒D海膽, 搞到我無得食....佢地仲要炫耀話海膽好甜......蒜香味好足, 聞落同食落都食得出蒜香~意粉亦碌得岩岩好, 而且有我愛的三文魚子(為左報復,我食晒三文魚子!!!)另外2個同事就嗌左石板燒美國牛板腱+巴西牛柳~聽到石板上的"炸炸聲"感覺真係好療癒~牛板腱好重牛味, 不過煮耐左有D位就有D韌~牛柳就軟淑易咬~各有各喜好啦~但配肉的汁, 真係好驚喜到我!!黑淑汁同蒜蓉汁點牛好出色, 送飯更出色!!!去到最後面, 我根本係倒汁送飯!