Simplylife Bakery Cafe (已結業)

返工辛苦咗成個星期，Happy Friday收工之後想同男朋友搵間西餐廳Chill下，迎接週末假期嘅來臨~無特別上網去搵，係葵芳廣場行咗陣，見「Simplylife Bakery Cafe」環境幾好就入咗去！ 後來上網search先知原來「Simplylife Bakery Cafe」係好多地方都有分店，餐廳裝修以當代歐陸式風格為主，環境舒適，氣氛浪漫，高樓底，落地大玻璃窗，空間感足，坐得好舒服！ 🧡餐湯餐包+紅酒（+$45）餐包係酸種法國麵包，大塊又好味！餐湯係忌廉南瓜湯，香甜又綿滑！紅酒斟得好滿，味道還好，飲完個人好放鬆！ 🧡加拿大天然豬鞍架·奶油瓜蓉·牛油松子·自家製意式乳清芝士（$218）豬鞍調味較淡，大件厚身，肉質鬆軟，易切易咬！搭配埋個奶油瓜蓉食又有另一番滋味！ 🧡慢煮肉碎手製闊條麵（$118）肉條碎好重牛香，好多汁！闊條麵有咬口，好掛汁，味道唔錯！ 整體來講，環境舒適，味道一般，價錢稍貴。如果大家行商場行到有啲攰，想搵間餐廳坐底休息下chill下，又對嘢食要求唔係話太高既，呢間都幾適合！

葵芳 Simply Life 位於新都會5樓，位置方便，環境舒適，旁邊係大玻璃，燈光偏暗，適合情侶或者想靜靜地食野嘅你🥰提供的菜式多樣化，由all day breakfast 到light meal 嘅沙律或者飽肚啲嘅意粉，應有盡有！湯同飲品就要另外加錢。打頭陣嘅係南瓜湯，口感綿細creamy，南瓜味濃郁。正如題目所講，simply life 嘅手製意粉係一大賣點，所以我今次就試咗慢煮肉碎手製闊條麵～手製闊條麵比坊間常見嘅闊條麵幼，但口感依然，更煙韌，令我停唔到口。而慢煮肉碎令菜式的味道更豐富，齒頰留香。美中不足的是肉碎同闊條麵的比例唔平均，以至於食到最後剩低肉碎，而淨食肉碎又太膩，令菜式稍為減分。最後係是日果茶—蜜桃紅茶！蜜桃的清爽十分適合為晚餐作結，中和前面菜式的味道。整體而言，Simply Life 性價比高，款式多而且環境舒服！