群眾小廚 (已結業)

區議會選舉後，市區開始平靜下來。適逢週末，先用年票去海洋公園，之後順道去灣仔食晚飯。上次經過「群眾小廚」已經想幫襯，今日終於執行目標。位於灣仔口的一條橫街，除了上班日子的午飯時段，晚上都以街坊生意為主。所以，裝修只是典型街坊小菜館，唔需要富麗堂皇；最緊要出品質素好味道及抵食。餐牌菜式選擇算多，以大眾化口味菜式為主，適合附近街坊的家常晚飯。椒鹽鮮魷（$118）外層的雞蛋漿及乾粉均勻地鋪滿每塊鮮魷表面，炸得顔色金黃、夠乾身；只是乾粉份量稍嫌太多，雖然香口，但咬落去就有點硬身了，味道亦偏鹹。魷魚唔夠肉厚，所以未夠爽口彈牙，但有鮮味。整體來說，算是一碟好食的椒鹽鮮魷，但有改進空間。蔥油炸子雞(半隻)（$178）雞皮香脆，雞肉入味、質感嫰滑，不過，味道同樣偏鹹。雞味一般，但自家調製的香蔥豉油就非常好味，彌補不足之處。兩味菜式味道皆偏濃偏鹹，典型街坊小菜館質素，估計其他小菜也是相同情況。講烹調技巧及菜式質素，當然未至於出類拔萃；但濃郁惹味，迎合大部份香港人對普通晚飯的要求。只是以小店的裝修、服務態度及出品質素來說，價錢似乎貴了一點，莫非地區因素？