木船 (已結業)

Wooden boat

307 食记

味道

环境

服务

卫生

抵食

4011

大埔

$51-100

港式泰国菜多国菜茶餐厅/冰室

253

泰皇單骨雞翼

4 已推介

$10

$58

奧志雷

等级4

2.1K

飲太多訓到過晒龍，都係請病假休息一下，順便去睇跌打醫下手手腳腳。跌打館登記完都有排等，走出去食個飯先。食物味道、質素、烹調真的不敢恭維，不明白為何依然客似雲來長做長有，不停有客出出入入。以往夜晚路過總有食客係度等位，還以為有什麼利害名菜。

早前阿媽節家庭晚飯，細妹每次挑選地方食飯都中伏，激死我 ﹗早前家全互小、蘇太羶骨、得割廚房，依家到莫船，暗裡食泥系列﹗食家必須要有冒險及犧牲精神，再次挑戰，睇下您有幾難食﹗飯腳難求，難得唔洗食自己有美少女一齊用膳。

落車無耐落狗屎，滴晒水入座，被侍應叔叔帶到盡頭死角處。有好有懷啦，無客行來行去，而且比較清靜，如果隔離檯無阿叔阿嬸同阿女不停講野就更舒服。最敝服務檯在餐廳正中間，侍應們都慣於向大門望去，招乎比較困難，幾乎每次都要高聲呼救。

仔細研究一下餐牌，都已經被蹂躪到鬆鬆的，想甩想爛的感覺，手感很霉很殘舊。菜色十分多樣化，小店來說選擇非常的多，也有不少挑起我的求知慾及好奇心，想試試什麼料子。

燒雞、海南雞、燒牛肉、生菜包、軟殼蟹、咖哩蟹、單骨雞翼、溶岩椰青焗海鮮飯、冬蔭功花蛤鍋、暹羅魚、明爐烏頭、炭燒大虎蝦、虎蝦菠蘿炒飯、鮮蟹肉炒飯、木船湯粉、泰式炒河、香辣炒意粉、等等等等，都是我狩獵目標。發現餐牌寫住伴法飽？意思係如果伴薄餅食，依個方法就會飽嗎？

竟然提早 1 小時 last call ？我入座時又唔講，我落單既時候就話依家 last call 要一次過叫晒，有無搞錯呀！全程無職員換骨碟，食完蜆蝦已滿到瀉，唯有將我隻碟讓比朋友，我直接用炒飯隻碟。比張迷你檯我坐，早已預計迫迫夾夾坐得不自在。隻隻碟都巨形款式，放碟海南雞已佔據大半張檯，還有兩隻骨碟兩隻碗兩杯水。炸雞翼、明爐花蛤、生蝦、冬蔭功湯、等等，稍一不慎大動作少少都掃晒落地，受著厭力地進食，那會放鬆心情、開心暢快﹗

檯都不夠很大，每道菜份量不是很多，但隻碟都巨形，阻手阻腳又浪費地方，無需要呢 ﹗只不過 6 道菜都無位放，迫到爆坐得好辛苦。可否看看食客進食速道才出菜呢？未夠 10 分鐘全部堆滿張檯，大排擋還是茶餐廳？心裡鬧著、嘴裡趙著，既然已進場，都好好地完成這餐吧。

到尾三道菜已放到張檯密麻麻，尾二道菜幾乎要疊面 ﹗唔該您地收走兩杯水同支梳打樽好無，堅係食到黑臉火都黎 ﹗醒目既都叫廚房停一停出貨，您叫我成碟一啖倒落肚呀，已經唔係第一次﹗最尾碟意粉送到先張兩張檯泊埋，那我情緒才可以稍為降溫﹗

凍香茅特飲，水水水到世界盡頭 ﹗真的齋用香茅浸水嗎？有否預早煲好放涼備用？有少少薑味，但完全無加糖水，堅係飲堅水，味道似牙薟水。支香茅拍都唔拍就插係度，邊會有味架﹗凍檸茶走甜，顏色陰沉不吸引，有茶味有澀味，味道還可以。青檸梳打，太甜加唔夠凍，越飲越頸渴。

泰皇單骨雞翼，試過幾間食肆都開邊炸到乾爭爭刮口鞋烚烚，使我極度厭惡 ﹗難得木船炸得蠻滿意喎。新鮮出爐熱烘烘香噴噴，醃得味濃炸得乾爽香口微脆，還有濃郁檸檬葉氣味。上層真的乾身，墊底的就有點油。魚餅，非常滑彈遠超我想像。春卷，油油脆脆，皮厚厚包著一丁點醬油肉碎。雞卷，好明顥係雞丸黎喎 ﹗結實的炸免治雞肉丸，雞味突出，香口不乾不鞋不硬。

馬拉盞炒椰菜苗，椰菜苗咸咸地辣辣地，紙皮質感韌韌的，散發淡淡苦澀味道。食到最底時全部都是油，潤澤我的雙脣立立令，多謝多謝。青咖哩軟殼蟹伴蒜蓉牛油焗法包，軟殼蟹及青咖哩汁還是熱的，十分難得。蒜蓉牛油焗法包滿有誠意，不是馬虎一篤仔牛油，大量牛油已滲入法包之中程現亮麗金黃色，焗得香脆不硬不刮嘴，陣陣蓉香飄飄。係時候合體發揮最強戰力﹗讓軟殼蟹躺在法包上，淋上青咖哩，擘大我的櫻桃小嘴塞入，一咬應聲撕裂﹗香脆甘甜咸鮮共冶一爐，食到默不作聲埋頭苦幹，滿意的回應。

暹羅魚，餐牌寫明製作需時 30 分鐘，實際不到 10 分鐘就送到。大家心裡有數發生什麼事，第一眼即聯想到五柳松子魚。沙律來的嗎？微弱的暖意近乎室溫，裡面直頭凍凍的炸魚件，腍劈劈淡茂茂有少少腥。泰式甜酸汁沙律，車厘茄木瓜絲甘筍絲脆肉瓜絲，我完全不知道師傅想如何演繹。此道菜是我點的，我會負責任全部魚吃掉，但那堆沙律菜真的受不了。

泰北沙嗲串燒拼盤，雞牛豬每款兩串還有豬勁肉墊底，不到 5 分鐘送上，快得出奇，心裡有算啦﹗入口便知龍定蟲，翻熱串燒。豉油燒汁甜甜辣辣夠惹味，沙嗲醬陰沉悶悶椰奶強勁，牛豬味道一模一樣，兩者同是鬆軟腍腍不乾鞋。雞肉本身已有沙嗲味道，比沙嗲汁可口好食。微溫豬頸肉極似豬肉乾，不肥美不嫩彈，邊位燶燶的。每片乾硬油兼鞋烚烚，給多點牙力趙吧，使到我非常疲累呢﹗

豬頸肉沙律，突然無燒牛肉沙律供應，激死我 ﹗驟眼見到豬頸肉沙律就是但啦。無留意串燒拼盤已有豬頸肉，叫多份豬頸肉一錯再錯。豬頸肉跟串燒拼盤一樣乾硬鞋油，有酸辣汁撈撈洗洗已比較好一點。我芹菜唔食，芫茜唔食，甘筍唔食，紫洋蔥免強可以，車厘茄都可以，青瓜都可以。

Handmade 粟米墨魚餅，招牌菜唔係掛 ﹗任何角度看都係黑媽媽的墨魚丸，不會是餅黎喎，以我認知餅應該係扁扁平平的嗎？不規則形墨魚丸，表面凹凸不平起晒刺，炸完變硬吉嘴刮口﹗整粒乾爭爭鞋烚烚，不彈不滑亦無汁，煎炸油膩感霸道野蠻，伏中之霸。

公車諗霸，即係泰式生蝦刺身，以西餐的雞尾蝦菜色掛在玻璃杯邊作演繹。蝦汁似足番茄蓉，不酸不辣淡茂茂，淡水生蝦已經沒怎麼的味道，搭上蒜片辣椒同吃會好一點。半爽半腍的質地，新鮮度欠佳，而且何解無挑腸呢？泰式鳳爪沙律，能否撈得均勻一點，上面唔辣，下面勁辣 ﹗室溫不夠舒服，凍凍地會更惹味，食得更暢快。爽脆彈的雞皮雞筋，味道清新有酸有辣亦有點，合格。

海南雞半隻，雞醬放置在高身黑色樽仔內，要夾著雞件沾醬食真的有點困難，叫食客如何是好？唯有倒係碟上或真接倒係雞肉上吧﹗粗獷地用鐵鏟盛著雞肉送到。完全去骨食得方便有誠意，但如果連骨享用，不經刀鏠切割會更鮮甜更多汁。大肥雞厚厚腍腍的雞皮油膩感重，白肉嬌嫩軟滑而雞甜味淡，輕輕的醃味夠清新。雞醬甜甜油油的，有雞油味但感覺不到白米醋或辣椒味道，沾上雞醬比淨食可口一丁點，整體有點悶滯感覺不想添食。

唔係炒既泰北街頭生菜包少辣，唔係炒即係點呢？即係撈還是烚呢？唔會微波爐叮掛？堅係成棵西生菜插係碗內，除最外層幾片外，其他全部自己擇下，會更新鮮？有諗頭喎﹗這樣可以洗得徹底乾淨的嗎？微暖的豬肉鬆食不到一點辣味，反而砂糖味及魚露味非常突出，幸好豬甜味及肉汁還在。混著紫洋蔥、蔥頭、香葉、等等，濕潤地讓生菜包著掉入口，不過不失食得過。

特濃冬蔭功湯配虎蝦，見照片用碗還以為係 1 人份量，誰知到來是細不鏽鋼煲，足足有 4 小碗湯喎 ﹗秀珍菇多得驚人，填滿整個煲底。無蔥無芫茜對我實在太好，奶味特濃，質地飽滿厚厚，無任何蝦味。茄味酸味辣味平均醇香，熱熱好味道，放涼就大打節扣。虎蝦肉霉霉腍腍，不想浪費照食可也。

冬蔭功明爐花蛤鍋，餐牌寫花甲，您做花甲老人咩？明爐放著蠟燭到來，全程沒有滾過亦沒有熱過，只是裝飾來的，算罷﹗微溫沒奶的冬蔭功湯浸著三十成熟的花蛤肉，無限縮水奀滋滋，乾瘦韌鞋無味道﹗大量秀珍菇及粉絲墊底，沒什麼特別，泰 sick 死亡習作。

卜卜大蜆酸辣煲，食過地獄級冬蔭功明爐花蛤鍋，難死到自盡，心仍有餘悸，膽粗粗繼續排單。湯汁充滿香茅金不換青檸汁味，突出味濃開胃醒腦。大蜆煮得剛烚無過火，肥美爆汁鮮甜，廚傅終能一雪前恥，吐氣揚眉﹗

豬肉丸泰式湯金邊粉走蔥走芽菜，超特濃湯底有少少過咸，厚厚震憾金不換味道。勁爽彈的肉丸，優質有著豬肉香甜。金邊粉份量超多有點吃不消，夾著豬油渣齊齊嘆，嚥韌的金邊粉，濃烈的湯汁，大力不停吸啜，互補不足，味道平衡很多了。

溶岩椰青焗海鮮飯，老媽一見到沒半點煙，椰青摸上手完全唔熱，即刻問是否冷盤來的？真有見地呢，笑死我。微溫焗飯，溶岩的意境只不過將白汁淋到周鬼圍都係，並不是幻想中焗到滾熱辣而像溶岩湧出黎既畫面，大失所望。椰奶味濃烈，濕濕沒有蛋味沒有鑊氣的炒飯底。鋪上塊半溶芝士，蓋著凍凍的半熟帶子，粉口無味雪藏半殼青口，鞋口無味雪藏海蝦，一試無妨，再試投降。

黃咖哩牛腩，琴晚想食羊腩無羊腩，今晚想食咖哩蟹無咖哩蟹 ﹗餐牌無寫要預訂喎，知道我就已經打電話黎訂啦！啡黑色爽爽牛腩，不是軟腍綿類，陣陣茶記牛羶味，而且濃濃豉油味拼咖哩怪怪的。薄餅，淨食微脆嚥韌，油香焦香，咸咸滿意。捲埋咖哩牛腩塞得嘴仔滿滿，濕濕香辣更賞心悅目﹗

爆蒜啖啖鮮蟹肉炒飯拼燒虎蝦，蝦殼黐到實一實不容易剝掉，唯有連殼趙再將殼回吐，您估食甘蔗咩 ﹗蝦爽結實不腍不霉，肉鮮咸香食得過。蟹肉微暖濕潤，炒飯熱烘烘，搭著品嚐香噴噴有蟹味有蛋味可口食多啖。黃咖哩牛腩撈鮮蟹肉炒飯，由細到大都覺得咖哩配炒飯係無敵組合，必定狂風掃落葉清得一粒飯都無剩﹗

青咖哩帶子意粉，點解青咖哩沉晒係底？是否炒定再用微波爐叮翻熱個意粉底，最後鋪上帶子嗎？上面淡茂茂無青咖哩汁，下面就濃濃黏稠滴晒汁，需要自行再撈勻一次。食得到強烈椰汁咖哩味，為何青咖哩會有山葵味？到底青咖哩還是青芥辣，還是 fusion 菜呢？雪藏帶子咸味重半生熟，綠色硬身意粉怪怪的。