棋哥燒鵝 (已結業)

今日返工真係忙到氣都冇時間抖 收工決定食我最愛既燒味黎慰勞下自己！成日經過棋哥見到佢個櫥窗掛住一隻二隻肥美既燒鵝真係好鬼誘惑 店裡面又有d好有趣既插畫 一直都心思思好想試下 今次就決定試試佢啦！由於疫情關係 夜晚6點後只能叫外賣 就趁等外賣既時候望下同影下佢d燒味啦 內在環境都唔錯 目測都幾企理同幾好坐 下次有機會都想黎堂食價錢都幾合理 飯可以免費轉做瀨粉或者米粉仲有手撕雞同常餐食添 一般燒味舖比較少見 有選擇困難症既我諗左好耐 最後叫左個燒鵝瀨粉同埋叉燒飯拎返去同屋企人share 雖然門口都唔少人等緊 但職員都好快手 5分鐘左右就有得拎喇！燒味黎講 燒鵝一直係我既最愛！呢度既燒鵝皮又薄又鬆化 肉質juicy 而且有陣陣煙燻既香味 非常出色叉燒既肥瘦度岩岩好 完全唔會韌同鞋 但又唔會肥到食到人成口油 高質！值得一讚既係叉燒既份量好多！超抵食！以後斬料加餸又多一個選擇喇！

今日同朋友二人係尖沙咀美麗華行街，行到咁上下見有啲肚餓，一出去就見到棋哥個招牌！其實之前已經係天后食過一次，確實令人回味！我同朋友分別單點咗燒鵝瀨粉及 雙併飯(燒肉及叉燒)燒鵝瀨粉點餐果陣我叫咗走胸，結果最後係脾位呢！好開心佢塊皮有少少炭燒既味道，一咬落去D油脂味滲哂出黎！另外加埋佢既調味醬，真係好惹味！！鵝既肉質又唔鞋口，唔會痴牙。抵讚！而瀨粉恰到好處，唔會太淋太硬，好彈牙！另外朋友點咗燒肉及叉燒雙併飯，見到叉燒半肥瘦，燒肉食落去，chok chok 聲，皮脆！如果下次黎到尖沙咀唔知食咩，推薦棋哥！