御八築地 (已結業)

御八築地是我經常幫襯的壽司店，因為一直覺得她的壽司新鮮又足份量，而且價錢相宜。今晚又來幫襯，照舊點了最喜歡的特長三文魚壽司﹑蟹籽沙律﹑燒三文魚魚頭和火龍卷。還加插了墨魚壽司和鰻魚壽司。特長三文魚壽司同一般迴轉店的三文魚壽司比，相同價錢但三文魚長2倍!! 次次來都食好多客先滿足。蟹籽沙律好味又足料。燒三文魚魚頭亦相當抵食，係成個頭,唔係只有下唇或上唇果種。火龍卷今次差左，裡面隻蝦冇以前咁大。墨魚壽司和鰻魚壽司就一般啦，可能唔係我最愛，感覺好多細骨。其實同好一兩年前比，呢度的份量已經明顯細左，不過明白通脹之下樣樣都縮水，何況呢度縮左水都仲大件過某些壽司店呢!

三個幾月之後，可能受到電視劇既影響。又掀起一陣食壽司既熱潮，本來想去元朗食既。不過又唔想去田中無了期咁等，就去遠小小既御八食飯。慶幸時間尚早，唔使等位就入到啦。首先上枱既係三文魚壽司，真係幾長架。三文魚好新鮮，而且都算幾肥美。壽司飯既硬度適中，無出現過一夾就散既情況。之後就到火龍卷，基本上十枱都有八枱會叫既。可算係呢度既招牌菜，不過唔知係唔係柯打太多，所以等左好耐先上枱。基本上，呢個賣相都唔錯既。只不過舊炸蝦只係微暖，而上次食個炸蝦係新鮮炸起既。但呢個都唔太重要，45蚊8件都算幾抵，無乜可以要求。食完壽司，就到啲熱食啦。我地叫左個牛仔骨石鍋飯，牛仔骨雖然數量唔多。不過味道都唔錯架。而個醬汁有小小似韓式辣汁，但又唔係太辣。不過，我覺得呢度既石頭飯既飯係比較濕既。結果，令到飯焦唔係太明顯。呢個食過幾次都出現既問題。再食番串牛脷，不過一食落去就覺得啲肉質好生。所以幫我地換個碟，之後果碟就正常好多啦。肉質都算幾淋既，而且好有肉味。所以次次都會叫架。食完個牛脷，再食碟羊架。羊架無羶味架，而且都幾有份量可言。佢地加左啲辣椒份去烤，更添惹味。食完所有野，都仲係有啲意猶未盡。於是加左個火焰吞拿魚壽司。